నిహారిక ‘టూ’మచ్...

Posted: 07/18/2016 06:16 PM IST

ఒక మనసు సినిమా అట్టర్ ఫ్లాప్ కావటం, అందులో నీహరిక నటనకు యావరేజ్ మార్కులు పడకపోవటంతో నాగబాబు ఇకపై ఆమెతో సినిమాలు చేయనిస్తాడా అన్న అనుమానాలు వ్యక్తం అయ్యాయి. పద్ధతిగా కనిపించి మెప్పించిన ఈ మెగా వారసురాలు ఇక సినిమాల్లో నటించడం అనుమానమే అనుకుంటున్న టైంలో ఓ వార్త అభిమానుల్లో సంతోషం నింపుతోంది.

ఆమె రెండో చిత్రం కోసం ఎంపిక పూర్తయ్యిందని ఓ వార్త తెలుస్తోంది. మరాఠీ హిట్ మూవీ 'హ్యాపీ జర్నీ'ని బెక్కం వేణుగోపాల్ నిర్మాతగా తెలుగులో రీమేక్ చేయడానికి సన్నాహాలు చేస్తున్నారట. ఇందుకోసం నిహారికను ఎంపిక చేసినట్లు తెలుస్తోంది. అన్నాచెల్లెళ్ల అనుబంధం నేపథ్యంగా కొనసాగే కథలో కొన్ని కారణాల వలన చనిపోయిన చెల్లెలు, ఆత్మగా అన్నయ్యతో వుంటూ అతనికి సహకరిస్తూ ఉంటుంది. ఆర్థికంగానే గాక, అతని ప్రేమ విజయవంతం కావటానికి కృషి చేస్తుంది.

ఆత్మ పాత్రకి నటన పరంగా ఎంతో అవకాశం ఉండటంతో, ఈ పాత్రలో నటించడానికి ఆమె గ్రీన్ సిగ్నల్ ఇచ్చిందని చెబుతున్నారు. ఇక ఆమె అన్నయ్య పాత్రలో హర్షవర్ధన్ రాణే నటించనున్నట్టు సమాచారం. ఈ మధ్య కథానాయికలు దెయ్యం పాత్రను పోషిస్తూ హిట్ల మీద హిట్లు కొడుతున్నారు. అలా నిహారిక కూడా ఆత్మ సాయంతోనే హిట్ కొట్టాలని ఉవ్విళ్లూరుతుందని సమాచారం. త్వరలోనే ఈ సినిమాకి సంబంధించిన పూర్తి వివరాలు అధికారికంగా వెల్లడి కానున్నాయి.

-భాస్కర్