ఫ్యాన్సీ రేటుకు ‘సరైనోడు’ ఓవర్సీస్ బిజినెస్

Posted: 01/25/2016 10:49 AM IST

స్టైలిష్ స్టార్ అల్లు అర్జున్ ‘సరైనోడు’ సినిమా ఫస్ట్ లుక్ పోస్టర్ రేపు జనవరి 26న విడుదల చేయనున్నారు. ప్రముఖ దర్శకుడు బోయపాటి శ్రీను దర్శకత్వంలో తెరకెక్కుతున్న ఈ ప్రతిష్టాత్మక చిత్రాన్ని గీతా ఆర్ట్స్ బ్యానర్ పై నిర్మాత అల్లు అరవింద్ భారీ బడ్జెట్ తో నిర్మిస్తున్నారు. కానీ ఫస్ట్ లుక్ ఇంకా విడుదల కాకముందే ‘సరైనోడు’కు మంచి బిజినెస్ జరుగుతోంది. ఈ సినిమాపై ఇప్పటికే భారీ అంచనాలు నెలకొనడంతో ఈ సినిమా పంపిణీ హక్కులను సొంతం చేసుకోవడానికి డిస్ట్రిబ్యూటర్స్ తెగ ప్రయత్నిస్తున్నారు.

గతంలో బన్నీ నటించిన పలు చిత్రాలు ఓవర్సీస్ లో మంచి వసూళ్లు రాబట్టడంతో ‘సరైనోడు’కు కూడా మంచి ఫ్యాన్సీ ఆఫర్లు వస్తున్నాయి. తాజా సమాచారం ప్రకారం ‘సరైనోడు’ చిత్ర ఓవర్సీస్ పంపిణీ హక్కుల కోసం 7.5 కోట్ల ఆఫర్ తో ఓ సంస్థ సొంతం చేసుకున్నట్లుగా తెలిసింది. అలాగే ఆంధ్రలో కూడా డిస్ట్రిబ్యూషన్స్ కోసం ఇప్పటికే బిజినెస్ ప్రారంభమయ్యినట్లుగా తెలుస్తోంది. త్వరలోనే అన్ని వివరాలు తెలియనున్నాయి.

బన్నీ సరసన రకూల్ ప్రీత్ సింగ్, కెథరిన్ థ్రెసా హీరోయిన్లుగా నటిస్తున్నారు. థమన్ సంగీతం అందిస్తున్నాడు. ఇందులోని ఓ స్పెషల్ సాంగ్ కోసం ‘లోఫర్’ హీరోయిన్ దిశా పటానీ చేయనుందని తెలిసింది. ఇప్పటికే విడుదలై ప్రీలుక్ పోస్టర్ అంచనాలు పెంచేసింది. కమర్షియల్ మాస్ యాక్షన్ ఎంటర్ టైనర్ గా రూపొందుతున్న ఈ చిత్రాన్ని త్వరలోనే ప్రేక్షకుల ముందుకు తీసుకురానున్నారు.