అఖిల్ విడుదలకు డేట్ ఫిక్స్ ?

Posted: 10/30/2015 04:50 PM IST

అక్కినేని అఖిల్ హీరోగా నటిస్తున్న తాజా చిత్రం ‘అఖిల్’. ‘పవర్ ఆఫ్ జువా’ ట్యాగ్ లైన్. మాస్ చిత్రాల దర్శకుడు వి.వి.వినాయక్ దర్శకత్వంలో తెరకెక్కుతున్న ఈ చిత్రాన్ని అన్నపూర్ణ స్టూడియోస్ సమర్పణలో శ్రేష్ట్ మూవీస్ బ్యానర్ పై హీరో నితిన్ భారీ బడ్జెట్ తో నిర్మిస్తున్నాడు.

అఖిల్ సరసన సయేశా సైగల్ హీరోయిన్ గా నటిస్తుంది. అనూప్ రూబెన్స్, థమన్ సంగీతం అందించిన ఈ చిత్ర ఆడియో ఇటీవలే విడుదలై మంచి టాక్ ను సొంతం చేసుకుంది. అలాగే ఇప్పటికే విడుదలైన ట్రైలర్లు, వీడియోలకు మంచి రెస్పాన్స్ వస్తోంది. ఈ సినిమాను దసరా కానుకగా అక్టోబర్ 20న విడుదల చేయాలని అనుకున్నారు.

కానీ గ్రాఫిక్స్ పనులు ఇంకా పూర్తికాకపోవడంతో సినిమా విడుదలను వాయిదా వేసారు. తాజా సమాచారం ప్రకారం ఈ చిత్రాన్ని నవంబర్ 11న ప్రపంచ వ్యాప్తంగా విడుదల చేయనున్నారు. తమిళంలో ఈ సినిమాను ‘సూర్య కవచం’ పేరుతో విడుదల చేయనున్నారు. ఈ సినిమాకు సంబంధించిన అన్ని వివరాలు త్వరలోనే చిత్ర యూనిట్ అధికారికంగా ప్రకటించనున్నారు.