మా ఎన్నికల్లో పోటీగా మంచు విష్ణు?

Posted: 03/04/2015 10:32 AM IST

తెలుగు సినిమా ఇండస్ట్రీలోని ‘మా’ (మూవీ ఆర్టిస్ట్ అసోసియేషన్) ఎన్నికలు త్వరలోనే జరుగనున్నాయి. కొత్త కార్యవర్గం కోసం మార్చి 29న అధ్యక్ష ఎన్నికలు జరుగనున్నాయి. అయితే గత రెండు దఫాలుగా ప్రముఖ నటుడు మురళీమోహన్ అధ్యక్షుడిగా వ్యవహరిస్తున్నారు. కానీ ఈసారి ఈ అధ్యక్షునిగా ఆయన పోటీ చేయట్లేదని తెలిసింది.

తాను ఈసారి అధ్యక్షునిగా పోటీ చేస్తానని నటుడు రాజేంద్రప్రసాద్ ఇటీవలే అధికారికంగా ప్రకటించారు. ఏకగ్రీవంగా గెలవడానికి ప్రయత్నిస్తున్నానని, ఒకవేళ వేరే ఎవరైనా పోటీలో పాల్గొన్న కూడా వారితో పోటీ చేయడానికి తాను సిద్ధమేనని రాజేంద్రప్రసాద్ స్పష్టం చేసారు.

అయితే తాజాగా మంచు విష్ణు పేరు కూడా వినబడుతోంది. మంచు విష్ణు గతకొద్ది కాలంగా ‘మా’ నిర్వహించే అన్ని కార్యక్రమాలను దగ్గరుండి నిర్వహించేవారు. అందుకే ఆయన పేరును ప్రస్తుతం సినీవర్గాలు సూచిస్తున్నాయి. మరి ఈ అధ్యక్ష పదవికి మంచు విష్ణు పోటీ చేస్తాడా లేక తనకెందుకులే అని వదిలేసుకుంటాడా అనే విషయం త్వరలోనే తెలియనుంది.