ఏప్రిల్ లో దశరధ్ తో వెంకీ సినిమా

Posted: 02/11/2015 05:19 PM IST

‘దృశ్యం’ సినిమాతో వెంకీ సినిమాల హవా మళ్లీ మొదలయ్యాయి. ఇటీవలే విడుదలైన ‘గోపాల గోపాల’ సినిమా కూడా బ్లాక్ బస్టర్ హిట్టయ్యింది. పవన్ కళ్యాణ్ తో కలిసి నటించిన ఈ మల్టీస్టారర్ చిత్రం ఘన విజయం సాధించింది. ఈ సినిమా తర్వాత రవితేజతో కూడా వెంకీ ఓ మల్టీస్టారర్ చిత్రం చేయబోతున్నాడని వార్తలొచ్చాయి. కానీ ఈ ప్రాజెక్టుపై ఇంకా ఎలాంటి ప్రకటన వెలువడలేదు.

కానీ వెంకీ తాజాగా ఓ ప్రాజెక్టుకు గ్రీన్ సిగ్నల్ ఇచ్చాడు. ‘సంతోషం’, ‘మిస్టర్ పర్ ఫెక్ట్’ వంటి విజయవంతమైన కుటుంబకథా చిత్రాలను తెరకెక్కించిన దర్శకుడు దశరథ్ దర్శకత్వంలో వెంకీ ఓ సినిమా చేయబోతున్నాడని వార్తలొస్తున్న విషయం తెలిసిందే. ఇటీవలే వెంకీని కలిసి దశరథ్ ఓ మంచి కుటుంబకథా చిత్రాన్ని వినిపించాడట. ఆ కథ వెంకీకి బాగా నచ్చడంతో.. ఆ కథను మరింత బాగా వర్కౌట్ చేయమని సలహా ఇచ్చాడట. దాదాపు వెంకీ చేయడానికి సిద్ధమైన ఆ కథను దర్శకుడు దశరథ్ చాలా జాగ్రత్తగా సిద్ధం చేసే పనిలోపడ్డాడట.

వెంకటేష్, దశరథ్ కాంబినేషన్లో రూపొందనున్న సినిమా ఎప్రిల్ మొదటి వారంలో ప్రారంభం కానుంది. ఎప్రిల్ లో రెగ్యులర్ షూటింగ్ జరుపుకోనుంది. ఇందులో వెంకీ సరసన శ్రియ, త్రిష, నయనతారల పేర్లు వినిపిస్తున్నాయి. ఈ సినిమాను సురేష్ బాబు నిర్మించనున్నారని సమాచారం. త్వరలోనే అన్ని వివరాలు అధికారికంగా ప్రకటించనున్నారు.