ఆత్మహత్యకు పాల్పడ్డ నటుడు మార్క్ సాలింగ్

Posted: 01/31/2018 10:20 AM IST

హాలీవుడ్ లో కలకలం రేపిన మార్క్ సాలింగ్ లైంగిక ఆరోపణల వ్యవహారం విషాదాంతం అయ్యింది. మంగళవారం ఉదయం ఆయన తన నివాసంలో ఉరి వేసుకుని ఆత్మహత్యకు పాల్పడ్డాడు. 35 ఏళ్ల ఈ అమెరికన్ నటుడు లైంగిక వేధింపులు, చైల్డ్ పోర్నోగ్రఫీ ఆరోపణలను ఆయన ఎదుర్కొంటున్నాడు.

పలు టీవీ సిరీస్ లలో నటించిన సాలింగ్ కు నటుడిగా మంచి పేరు ఉంది. 2015లో అతనిపై లైంగిక వేధింపులు, చైల్డ్ పోర్నోగ్రఫీ ఆరోపణలు వచ్చాయి. ఈ నేపథ్యంలో ఆయనను అరెస్ట్ చేసిన పోలీసులు 2016లో ఛార్జ్ షీట్ నమోదు చేశారు. అతని ల్యాప్ టాప్ ను పరిశీలించగా... దాదాపు 50 వేల చైల్డ్ పోర్నోగ్రఫీ ఫొటోలు, వీడియోలు లభించాయి. ఈ నేపథ్యంలో సాలింగ్ ను జడ్జి దోషిగా తేల్చారు. మార్చి 7న ఆయనకు శిక్ష ఖరారు కానుంది.

అయితే ఇంతలోనే మార్క్ ఆత్మహత్యకు పాల్పడ్డాడు. ఈ విషయాన్ని ఆయన తరపు న్యాయవాది మైఖేల్ ప్రోకార్డ్ ఓ ప్రకటన ద్వారా తెలిపాడు. గత ఆగస్టులో ఆయన ఓసారి ఆత్మహత్యకు ప్రయత్నించి విఫలమయ్యాడు.