అమితాబ్ కు ముంబై కార్పొరేషన్ నోటీసులు

Posted: 10/26/2017 08:45 AM IST

బాలీవుడ్ బిగ్ బీ అమితాబ్ బచ్చన్ కు బృహన్ ముంబై మునిసిపల్ కార్పొరేషన్ (బీఎంసీ) షాకిచ్చింది. నిబంధనలకు విరుద్ధంగా తన లగ్జరీ బంగళా 'స్వాంక్'ను నిర్మించుకున్నారని ఆరోపిస్తూ పట్టణ మరియు ప్రాంతీయ ప్రణాళిక సంస్థ నోటీసులు జారీ చేసింది. దాన్ని ఎందుకు కూల్చరాదో తెలియజేయాలంటూ గడువు విధిస్తూ వీటిని పంపినట్లు సమాచారం.

అత్యంత విలాసవంతమైన ఈ భవనం ముంబైలోని గోరేగామ్ ఈస్ట్ ప్రాంతంలో ఫిలిం సిటీకి సమీపంలో ఉందన్న సంగతి తెలిసిందే. ఇదిలావుండగా, అమితాబ్ బచ్చన్ తో పాటు ముంబై పరిధిలో అక్రమంగా బంగళాలు నిర్మించుకున్నారన్న ఆరోపణలపై నిర్మాతలు రాజ్ కుమార్ హిరానీ, సంజయ్ వ్యాస్, హరీష్ జగిత్యాని, హరీష్ ఖండేల్ వాల్, పంకజ్ బాలాజీలతో పాటు ఓబరాయ్ రియల్టీ సంస్థకు కూడా మునిసిపల్ అధికారులు నోటీసులు జారీ చేశారని మీడియా కథనాలు చెబతున్నాయి.

గతంలోనే స్వాంక్ భవంతిపై ఆరోపణలు రాగా అప్పటి అధికారులు అంతగా పట్టించుకోలేదు. ఇప్పుడు మరోసారి ఆ భవనం వ్యవహారం వెలుగులోకి రావటంతో టౌన్ ప్లానింగ్ అధికారులు తనిఖీలు చేసి నిబంధనలకు విరుద్ధంగా బంగళాను నిర్మించినట్లు తేల్చారు. పైగా బేస్ మెంటు, లిఫ్ట్, ప్రహరీగోడ తదితరాలు ఆమోదిత ప్లాన్ ప్రకారం లేవని తేల్చారు. దీంతో బిగ్ బికి నోటీసులు జారీ చేసినట్టు మునిసిపల్ అధికారులు వెల్లడించారు.