మళ్లీ నిర్మాతగా నేచురల్ స్టార్

Posted: 08/29/2017 03:27 PM IST

నేచురల్ స్టార్ నాని మరో మూడేళ్ల దాకా కాల్షీట్ ఖాళీగా లేకుండా నింపేసుకున్నాడు. ప్రస్తుతం ఎంసీఏ షూటింగ్ దశలో ఉండగా, తర్వాత కృష్టార్జునయుద్ధంతో రెడీగా ఉన్నాడు. మరోపక్క అవసరాలతో ఓ సినిమా, మరో యంగ్ డైరక్టర్ తో మరో కమిట్ మెంట్ ను ఇచ్చి ఉన్నాడు.

ఈ నేపథ్యంలో నాని మరోసారి నిర్మాతగా మారి ఓ సినిమాను తెరకెక్కించబోతున్నాడు. ప్రశాంత్ వర్మ అనే కొత్త దర్శకుడు ఈ చిత్రంతో పరిచయం కాబోతున్నాడు. ఇంతకు ముందు డైలాగ్ ఇన్ ద డార్క్ వంటి పాపులర్ షార్ట్ ఫిల్మ్స్ తీసింది ఇతనే. నిజానికి నానినే ఈ సినిమాలో హీరోగా చేద్దామని అనుకున్నాడంట. అయితే వరుస కమిట్ మెంట్లతో సినిమాను ప్రోడ్యూస్ చేసేందుకు రెడీ అయిపోయాడు.

ఓ స్టార్ హీరోను ఈ సినిమా కోసం సంప్రదించబోతున్నట్లు సమాచారం. త్వరలోనే ప్రీ ప్రోడక్షన్ పనులు ప్రారంభించి, చిత్రాన్ని మొదలుపెట్టేందుకు సన్నాహాలు చేస్తున్నాడు. గతంలో నాని డి ఫర్ దోపిడీ అనే చిత్రానికి నిర్మాతగా వ్యవహరించిన విషయం తెలిసిందే.