గ్యారేజ్ సక్సెస్ మీట్ వాయిదా వేసేశారు

Posted: 09/07/2016 06:11 PM IST

Janatha garage success meet postponed due to ganesh immersion

'జనతా గ్యారేజ్' విడుదలైన రోజు టాక్ ఎలా ఉన్నా ప్రస్తుతం సృష్టిస్తున్న కలెక్షన్ల ప్రభంజనం చూస్తే ఎవరికైనా దిమ్మతిరగటం ఖాయం. విడుదలైన కేవలం ఆరంటే ఆరు రోజుల్లోనే ఈ సినిమా 60 కోట్ల షేర్ ను వసూలు చేసింది. ఇప్పటికే ఓవరాల్ గా నాన్ బాహుబలి సినిమాల చరిత్రలో కేవలం ఐదురోజుల్లోనే మొదటిస్థానాన్ని ఆక్రమించిన జనతా... ఆరో రోజు చేరేటప్పటికి మిగిలిన సినిమాలకు అందనంతగా దూసుకుపోతుంది.

ఓవర్సీస్ లో ఏ సౌత్ హీరోకి సాధ్యం కానీ రికార్డును ఎన్టీఆర్ క్రియేట్ చేశాడు. దీంతో ఈ సినిమాకి ఈ స్థాయి విజయాన్ని అందించిన ప్రేక్షకులకి .. అభిమానులకి ఈ సినిమా టీమ్ ధన్యవాదాలు తెలియజేయాలని అనుకుంది. అందుకోసం వైజాగ్ లో ఈ నెల 10వ తేదీన విజయోత్సవ వేడుకను ఏర్పాటు చేస్తే బాగుంటుందని ఆలోచన చేశారు. ఆర్ కె బీచ్ లో దీనికి సంబంధించి ఏర్పాట్లు కూడా ప్రారంభించేందుకు మైత్రి మూవీ మేకర్స్ సిద్ధమైంది. అయితే తాజాగా అందుతున్న సమాచారం ఏంటంటే... ఈ కార్యక్రమాన్ని వాయిదా వేయాలని భావిస్తున్నారంట.

ప్రస్తుతం గణేష్ నిమజ్జన కార్యక్రమం ఉన్నందున కొద్దిరోజుల దీనిని పోస్ట్ పోన్ చేయాలని చిత్ర యూనిట్ భావిస్తున్నట్లు తెలుస్తోంది. భద్రతా పరంగా కూడా ఇబ్బందులు తలెత్తె అవకాశం ఉండటంతో మళ్లీ ఈ కార్యక్రమాన్ని ఎప్పుడు నిర్వహించేది త్వరలో ప్రకటిస్తారంట. ఒకవేళ ఖచ్చితంగా అదే రోజున నిర్వహించాల్సి వస్తే మాత్రం వేదికను మార్చే ఆలోచన చేస్తుందట. ప్రస్తుతానికైతే నిర్మాతల దగ్గరి నుంచి అధికారిక ప్రకటన రావాల్సి ఉంది.