సమంత మీద పడి గాలి తీసేశారు

Posted: 06/27/2016 12:31 PM IST

సౌత్ బేబీ డాల్ సమంతకు ఉన్న ఫ్యాన్స్ ఫాలోయింగ్ అసలు చెప్పటం ఎందుకు. మొన్నటిదాకా కేవలం తెలుగు అభిమానుల వరకే సొంతం అయిన ఈ నటి క్రేజ్, ఆపై టాప్ హీరోలతో చేయటంతో కోలీవుడ్ కు పాకిపోయింది. అయితే ఆ క్రేజే ఇప్పుడు ఆమెకు భయంకర అనుభవాలను పంచుతోంది. ఎక్కడికెళ్లినా అభిమానులే ఆమెకు చుక్కలు చూపుతున్నారు.
 
మదురై అభిమానుల అత్యుత్సాహంతో ఈ సౌత్ బ్యూటీకి ఊపిరి ఆడని పరిస్థితి ఏర్పడింది. ఆదివారం ప్రముఖ సంస్థ 'వీకేర్'  తమ కొత్త బ్రాంచ్ ప్రారంభోత్సవానికి సమంతను పిలిపించింది. అయితే ఆమె రాక గురించి ముందే పెద్దఎత్తున ప్రచారం చేయటంతో భారీ సంఖ్యలో జనాలు ఎగబడ్డారు. సమంత రాగానే ఆమెను చుట్టుముట్టారు. తొలుత, ఆమెను ఎలాగోలా షోరూములోకి తీసుకువెళ్లగలిగిన సిబ్బంది, తిరిగి బయటున్న కారులోకి ఎక్కించలేకపోయారు.

తమ అభిమాన తారను చూడనివ్వటం లేదన్న కోపంతో ఫ్యాన్స్ ఏకంగా ఆమె కారుకే పంచర్లు చేశారు. ఖంగుతిన్న నిర్వాహకులు అతికష్టం మీద తిరిగి ఆమెను షోరూమ్ లోకి తీసుకెళ్లారు. అనంతరం పోలీసులకు సమాచారం ఇవ్వటంతో వారొచ్చి లాఠీ చార్జ్ చేసి పరిస్థితి అదుపులోకి తెచ్చారు. ఈ పరిణామాలతో షాక్ తిన్న సమంత, ఈ చేదు అనుభవమంతా తన సోషల్ మీడియాలో షేర్ చేసుకుంది.

భాస్కర్