వెయ్యిమందితో గౌతమీపుత్ర యుద్ధం

Posted: 06/02/2016 10:23 AM IST

నందమూరి బాలకృష్ణ 100వ చిత్రంగా రూపుదిద్దుకుంటున్న ‘గౌతమీపుత్ర శాతకర్ణీ’ చిత్రం గురించి రోజుకో కొత్త వార్త వినిపిస్తూనే వుంది. ఈ సినిమా టైటిల్ లోగో, పోస్టర్ విడుదలైన క్షణం నుంచి ఈ సినిమాపై భారీ అంచనాలు నెలకొన్నాయి. బాలయ్య అభిమానులు ఈ సినిమాపై టీజర్, టైటిల్ సాంగ్ ను కూడా రూపొందించి, సినిమాపై వున్న అంచనాలను మరింతగా పెంచేస్తున్నారు.

దర్శకుడు క్రిష్ దర్శకత్వంలో రూపొందుతున్న ఈ చిత్రం ఇటీవలే మొదటి షెడ్యూల్ పూర్తి చేసుకొని, రెండవ షెడ్యూల్ ను ప్రారంభించింది. ప్రస్తుతం రెండవ షెడ్యూల్ హైదరబాద్ లోని చిలుకూరి బాలాజీ టెంపుల్ సమీపంలో వేసిన ఓ భారీ సెట్ లో షూటింగ్ జరుగుతుంది. దాదాపు వెయ్యి మంది జూనియర్ ఆర్టిస్టులతో, 200 పడవలను వినియోగిస్తూ చిత్రీకరిస్తున్నారు. ఇంట్రవెల్ కు ముందు సముద్రంలో జరిగే ఈ సముద్ర యుద్ధ సన్నివేశాలకోసం చిత్రీకరిస్తున్నారు.

ఇందులో యాక్షన్ ఎపిసోడ్స్, వార్ సీన్లు హైలెట్ గా నిలువనున్నాయి. దర్శకుడు క్రిష్ చాలా కేర్ తీసుకొని ఈ సినిమాను రూపొందిస్తున్నారు. యువ సంగీత దర్శకుడు దేవిశ్రీప్రసాద్ సంగీతం అందిస్తున్నాడు. త్వరలోనే ఈ సినిమాను ప్రేక్షకుల ముందుకు తీసుకురానున్నారు.

బాలకృష్ణ టైటిల్ పాత్ర పోషిస్తున్న ఈ చిత్రానికి సమర్పణ: బిబో శ్రీనివాస్, ఆర్ట్ డైరెక్టర్: భూపేష్ భూపతి, సినిమాటోగ్రాఫర్: జ్ఞాన శేఖర్, సంగీతం: దేవిశ్రీప్రసాద్, సాహిత్యం: సీతారామశాస్త్రి, మాటలు: సాయిమాధవ్, ఫైట్స్: రామ్ లక్ష్మణ్, సహ నిర్మాత: కొమ్మినేని వెంకటేశ్వరరావు, నిర్మాతలు: వై.రాజీవ్ రెడ్డి, జాగర్లమూడి సాయిబాబు, దర్శకత్వం: క్రిష్.