చనిపోయిన హీరోతో దర్శకుడి విజువల్ వండర్

Posted: 06/01/2016 03:41 PM IST

దేవి, అమ్మోరు, అంజి, దేవుళ్లు, అరుంధతి వంటి గ్రాఫిక్స్ చిత్రాలను తెలుగు ప్రేక్షకులను అందించి సీనియర్ లెజండరీ దర్శకులు కోడి రామకృష్ణ దర్శకత్వంలో రాబోతున్న మరో గ్రాఫిక్స్, విజువల్ వండర్ చిత్రం ‘నాగరహావు’. కన్నడంలో రూపొందుతున్న ఈ సినిమాలో లెజండరీ నటుడు కన్నడ స్టార్ డా.విష్ణువర్ధన్ ప్రధాన పాత్రలో నటించారు. నిజానికి విష్ణువర్ధన్ 2009లోనే మృతిచెందారు. కానీ ఈ సినిమాతో మరోసారి ఆయనను సినీ ప్రేక్షకుల ముందుకు గ్రాఫిక్స్ సాయంతో తీసుకురానున్నారు దర్శకులు కోడిరామకృష్ణ.

కానీ చనిపోయిన నటుడిని గ్రాఫిక్స్ సాయంతో ఓ పూర్తి స్థాయి సినిమాను తెరకెక్కించటం భారతీయ సినీ చరిత్రలో ఇదే తొలిసారి కావటం విశేషం. చనిపోయిన విష్ణువర్ధన్ను ఈ సినిమాలో హీరోగా చూపించటం కోసం ఏడు దేశాల్లోని 576 మంది గ్రాఫిక్స్ నిపుణులు 730 రోజుల పాటు శ్రమించారని తెలిసింది. ప్రతిష్ఠాత్మకంగా తెరకెక్కుతున్న ఈ సినిమా జూలై నెలలో ప్రేక్షకుల ముందుకు రానుంది.

ఇప్పటికే విడుదలైన టీజర్ కు భారీ రెస్పాన్స్ వస్తోంది. ఇందులో హీరోయిన్ రమ్య ఓ కీలక పాత్రలో నటిస్తుంది. భారీ గ్రాఫిక్స్ తో రూపొందుతున్న ఈ సినిమా కోసం కన్నడ సినీ అభిమానులు ఎంతగానో ఎదురుచూస్తున్నారు. త్వరలోనే ఈ చిత్రాన్ని ప్రపంచ వ్యాప్తంగా విడుదల చేయడానికి సన్నాహాలు చేస్తున్నారు. ఒకవేళ ఈ సినిమా హిట్టయ్యితే కోడి రామకృష్ణ క్రేజ్ మరింతగా పెరగడం ఖాయం.