స్టైలిష్ లుక్ తో అదరగొడుతున్న వరుణ్ తేజ

Posted: 04/09/2016 02:41 PM IST

‘ముకుంద’, ‘కంచె’, ‘లోఫర్’ చిత్రాల తర్వాత మెగా హీరో వరుణ్ తేజ హీరోగా ఓ చిత్రం రూపొందనుంది. ప్రముఖ కమర్షియల్ కామెడీ ఎంటర్ టైనర్ చిత్రాల దర్శకుడు శ్రీనువైట్ల దర్శకత్వంలో వరుణ్ తేజ నాల్గవ చిత్రం తెరకెక్కనుంది. ఈ సినిమా కోసం వరుణ్ భారీగా గడ్డం పెంచి, కొత్త లుక్ లో కనిపిస్తున్నాడు.

ఇప్పటికే విడుదలైన ఓ ఫోటోకు మంచి రెస్పాన్స్ వచ్చింది. అయితే తాజాగా మరో ఫోటోను విడుదల చేసారు. ఈ ఫోటో చూస్తుంటే.. వరుణ్ క్యారెక్టర్ ఎలా వుండబోతుందోననే ఆసక్తి నెలకొంది. భారీ గడ్డం, మీసాలతో.. ఓ రెబల్ లుక్ లో చాలా స్టైలిష్ గా కనిపిస్తున్నాడు.

లవ్, రొమాంటిక్, యాక్షన్, కామెడీ ఎంటర్ టైనర్ గా రూపొందునున్న ఈ చిత్రానికి సంబంధించిన ప్రీ ప్రొడక్షన్ కార్యక్రమాలు శరవేగంగా జరుగుతున్నాయి. ఇందులో వరుణ్ ఇద్దరు హీరోయిన్లతో రొమాన్స్ చేయనున్నాడు. హీరోయిన్లుగా రకూల్ ప్రీత్ సింగ్, రెజీనా కసాండ్రా, లావణ్య త్రిపాఠీ పేర్లు వినిపిస్తున్నాయి. మిక్కీ జే మేయర్ సంగీతం అందించనున్నాడు. ఈ చిత్రానికి సంబంధించిన అన్ని వివరాలను అధికారికంగా ప్రకటించనున్నారు.