పవన్ కళ్యాణ్ ‘ఖుషీ2’ మ్యూజిక్ స్టార్ట్

Posted: 03/14/2016 11:37 AM IST

పవర్ స్టార్ పవన్ కళ్యాణ్ కు భారీ ఫ్యాన్ ఫాలోయింగ్, క్రేజ్ ను తెచ్చిపెట్టిన చిత్రం ‘ఖుషీ’. ఎస్.జె.సూర్య దర్శకత్వంలో రూపొందిన ఈ చిత్రాన్ని శ్రీ సూర్య మూవీస్ బ్యానర్ పై నిర్మాత ఎ.ఎం.రత్నం నిర్మించిన ఈ చిత్రానికి మణిశర్మ సంగీతం అందించాడు. పవన్ సరసన భూమిక హీరోయిన్ గా నటించింది. 27 April 2001లో విడుదలైన ఈ చిత్రం బ్లాక్ బస్టర్ హిట్ గా నిలిచింది.

పవన్ కళ్యాణ్ కు భారీ బ్రేక్ ను అందించింది. అయితే ప్రస్తుతం ఈ చిత్రానికి సీక్వెల్ తెరకెక్కనుంది. మళ్లీ వీరి కాంబినేషన్లోనే ఈ సీక్వెల్ ప్రాజెక్ట్ సెట్స్ పైకి వెళ్లనుంది. ఎస్.జె.సూర్య దర్శకత్వంలో రూపొందనున్న ‘ఖుషీ2’ చిత్రాన్ని ఎ.ఎం.రత్నం భారీ బడ్జెట్ తో నిర్మించనున్నారు. అయితే ఈ సీక్వెల్ చిత్రానికి యువ సంగీత దర్శకుడు అనూప్ రూబెన్స్ సంగీతం అందిస్తున్నాడు.

ఇప్పటికే స్ర్కిప్ట్ వర్క్ పూర్తిచేసినట్లుగా తెలుస్తోంది. ఇటీవలే మ్యూజిక్ సిట్టింగ్స్ ప్రారంభమయ్యాయి. ప్రముఖ పాటల రచయిత రామజోగయ్యశాస్త్రి ఈ చిత్రానికి సాహిత్యాన్ని అందిస్తున్నారు. ఈ విషయాన్ని రామజోగయ్యశాస్త్రి తన సోషల్ మీడియా ద్వారా తెలియజేస్తూ ఓ ఫోటోను పోస్ట్ చేసాడు. ఇందులో రచయిత ఆకుల శివ, సంగీత దర్శకుడు అనూప్ రూబెన్స్, దర్శకుడు ఎస్.జె.సూర్యలతో పాటు రామజోగయ్య శాస్త్రిలను చూడవచ్చు.

ఇప్పటికే పవన్ కళ్యాణ్-అనూప్ ల కాంబినేషన్లో ‘గోపాల గోపాల’ వంటి మ్యూజికల్ హిట్ చిత్రం వచ్చింది. ఈ సినిమాకు అనూప్ అందించిన పాటలు, బ్యాగ్రౌండ్ మ్యూజిక్ కు మంచి ప్రశంసలు దక్కాయి. ఈ సినిమా ఆడియో వేడుకలోనే పవన్ తన తర్వాతీ చిత్రానికి అనూప్ అవకాశం ఇస్తానని మాట ఇచ్చినట్లుగానే... ‘ఖుషీ2’ చిత్రానికి అవకాశం ఇచ్చి పవన్ తన మాట నిలబెట్టుకున్నాడని చెప్పుకోవచ్చు. ఈ సినిమా వివరాలను మరికొద్ది రోజుల్లోనే అధికారికంగా ప్రకటించనున్నారు.

ఇప్పటికే ప్రీ ప్రొడక్షన్ కార్యక్రమాలు మొదలుపెట్టేసారు. ఈ సీక్వెల్ ప్రాజెక్టులో భాగంగా తెలుగు వర్షెన్ లో పవన్ కళ్యాణ్, తమిళ వర్షెన్ లో విజయ్ నటించనున్నారు. త్వరలోనే ఈ ప్రాజెక్ట్ సెట్స్ పైకి వెళ్లనుంది. ప్రస్తుతం పవన్ కళ్యాణ్ నటిస్తున్న ‘సర్దార్ గబ్బర్ సింగ్’ సినిమా షూటింగ్ చివరి దశకు చేరకుంది. ఏప్రిల్ 8న ప్రపంచ వ్యాప్తంగా, గ్రాండ్ గా ప్రేక్షకుల ముందుకు రానుంది.