‘నాన్న’ కోసం స్పెయిన్ కి వెళ్లనున్న ఎన్టీఆర్

Posted: 10/23/2015 04:58 PM IST

Nannaku prematho movie unit ready to shift spain for next schedule

టాలీవుడ్ యంగ్ టైగర్ జూనియర్ ఎన్టీఆర్ ప్రస్తుతం 25వ సినిమా ‘నాన్నకు ప్రేమతో’లో నటిస్తున్నాడు. సుకుమార్ దర్శకత్వంలో రూపొందుతున్న ఈ చిత్రంలో రకుల్ ప్రీత్ సింగ్ హీరోయిన్ గా నటిస్తోంది. సూపర్ క్లాస్ ఎంటర్టైనర్ గా రానున్న ఈ సినిమాకి సంబంధించి దసరా కానుకగా టీజర్ రిలీజ్ అయిన విషయం తెలిసిందే! ఆ టీజర్ కి మంచి రెస్పాన్స్ రావడమే కాకుండా యూట్యూబ్ లో సెన్సేషనల్ రికార్డ్స్ సృష్టిస్తోంది. టీజర్ కే ఇంత రెస్పాన్స్ వస్తుండటంతో ఈ సినిమా బాక్సాఫీస్ దగ్గర కచ్చితంగా కలెక్షన్ల వర్షం కురిపిస్తుందని ట్రేడ్ వర్గాలు అప్పుడే అంచనా వేస్తున్నాయి.

ఇదిలావుండగా.. ఇటీవల లండన్ లో 80 రోజుల పాటు ఈ చిత్ర టీం మేజర్ పార్ట్ షూటింగ్ ఫినిష్ చేసుకొని హైదరాబాద్ వచ్చింది. కొన్నాళ్లు ఇక్కడ సేద తీర్చుకున్న ఈ చిత్రబృందం.. ఇప్పుడు తదుపరి షెడ్యూల్ కోసం స్పెయిన్ వెళ్ళేందుకు సిద్ధమవుతోంది. ఇదివరకే ఈ విషయాన్ని మూవీ యూనిట్ స్పష్టం చేసింది కూడా. కానీ.. ఎప్పుడు స్పెయిన్ వెళ్లనున్నారనే విషయంపై క్లారిటీ ఇవ్వలేదు. ఇప్పుడు తాజాగా ఈ చిత్ర టీం స్పెయిన్ షెడ్యూల్ కి ముహూర్తం ఫిక్స్ చేసింది. ఈ నెలాఖరున ఈ చిత్ర టీం స్పెయిన్ కు వెళ్లనుందని సమాచారం. అలాగే నవంబర్ 1 నుంచి స్పెయిన్ లో ఈ మూవీ రెగ్యులర్ షూటింగ్ ని మొదలు పెడతారు. సుమారు 30 రోజుల పాటు జరగనున్న ఈ షెడ్యూల్ తో ఈ సినిమా షూటింగ్ మొత్తం పూర్తవుతుంది. ఆ తర్వాత మిగిలి ఉన్న చిన్న చిన్న బిట్స్ ని హైదరాబాద్ లో షూట్ చేస్తారు.

జగపతి బాబు, రాజేంద్ర ప్రసాద్ లు ముఖ్య పాత్రలు పోషిస్తున్న ఈ సినిమాకి బివిఎస్ఎన్ ప్రసాద్ నిర్మాత. దేవీశ్రీ ప్రసాద్ మ్యూజిక్ అందించిన ఈ సినిమా సంక్రాంతి కానుకగా 2016 జనవరి 8న రిలీజ్ కానుంది. త్వరలోనే ఈ సినిమా ట్రైలర్ తోపాటు పాటల్ని కూడా విడుదల చేసేందుకు దర్శకనిర్మాతలు సన్నాహాలు చేస్తున్నారు.