‘దెయ్యమై వస్తున్నానమ్మో’ అంటున్న సనా..

Posted: 03/11/2015 07:01 PM IST

‘గగనం’, ‘మిస్టర్ నూకయ్యా’, ‘కత్తి’ వంటి సినిమాల్లో నటించిన సనాఖాన్.. ఆ మూవీలు అంతగా విజయం సాధించకపోవడంతో ఈమెకు ఆఫర్లు రాలేదు. దీంతో అరకొర సినిమాలు చేసుకుంటూ కాలం గడిపింది. అయితే.. హిందీ పరిశ్రమలో ఆఫర్లు సాధిస్తే తనకు క్రేజ్ బాగా వస్తుందన్న నమ్మకంతో ఈమె గతకొంతకాలంగా బాలీవుడ్ పై దృష్టి సారించింది. ఈ నేపథ్యంలోనే ఆమె ‘బిగ్ బాస్’ రియాలిటీ షోలో పాల్గొంది. ఆ షో ద్వారా మంచి పేరు సాధించిన ఈ నటికి సల్మాన్ నటించిన ‘జై హో’ సినిమాలో ఓ కీలకపాత్రలో నటించే ఆఫర్ దక్కింది. దాంతో బాలీవుడ్ లో ఈమెకు కాస్త గుర్తింపు లభించింది. ఈ నేపథ్యంలోనే ఈ అమ్మడికి ఓ సినిమాలో కథానాయికగా నటించే ఛాన్స్ వచ్చింది.

నటుడు అఫ్తాబ్ శివదసాని హీరోగా హిందీలో ఓ హారర్ చిత్రం రూపొందనుంది. ఈ దెయ్యాల చిత్రంలోనే అమ్మడికి హీరోయిన్ గా నటించే ఛాన్స్ వరించింది. ఇందులో వీరిమధ్య కొన్ని ఘాటు సన్నివేశాలు కూడా వుంటాయని యూనిట్ వర్గాలు పేర్కొంటున్నాయి. ప్రేమికుల మధ్య ఓ దెయ్యం ఎంట్రీ అయితే వాళ్లు పడే పాట్లు, సమస్యలు ఏంటనే కథానేపథ్యంలో ఈ మూవీ సాగుతుందని అంటున్నారు. ప్రస్తుతం ఈ మూవీకి సంబంధించి ప్రీ ప్రొడక్షన్ పనులు జరుగుతున్నాయి. అన్ని అనుకున్నట్లుగా జరిగితే.. త్వరలోనే ఈ మూవీ సెట్స్ పైకి వెళ్లనుందని బాలీవుడ్ సమాచారం! ఈ మూవీకి సంబంధించి మరిన్ని వివరాలు ఇంకా వెలువడి కావాల్సి వుంది.

ఇదిలావుండగా.. చాలాకాలం వేచిచూసిన తర్వాత తనకు ఈ హారర్ చిత్రంలో కథానాయికగా నటించే ఆఫర్ వచ్చినందుకు సనా ఖాన్ ఆనందం వ్యక్తం చేస్తోంది. తన నిరీక్షణ ఇప్పుడు ఫలించిందని చెబుతున్న ఈ అమ్మడు.. ఈ సినిమాలో బాగా నటించగలనన్న నమ్మకాన్ని వ్యక్తం చేస్తోంది. అంతేకాదు.. ఈ మూవీతో తన సినీకెరీర్ మరింత మెరుగుపడుతుందని అమ్మడు భావిస్తోంది. మరి.. ఈ హారర్ చిత్రం ఆమె సినీకెరీర్ లో వెలుగులు నింపుతుందా..? లేదా చీకటిలోకి తీసుకెళుతుందా..? అన్నది తెలియాలంటే వేచి చూడాల్సిందే!