కింగ్ కోటీశ్వరుడులో గోవిందుడి స్పెషల్ ఎంట్రీ

Posted: 02/10/2015 10:34 AM IST

‘గోవిందుడు అందరివాడేలే’ సినిమా విడుదలై చాలా కాలం అవుతున్న కూడా చరణ్ ఇంకా తన కొత్త సినిమాను ప్రారంభించలేదు. ఈ వేసవి సెలవుల్లో చరణ్ సినిమా విడుదలవుతుందని భావించిన అభిమానులు భారీగా నిరాశ చెందారు. ఆ అభిమానుల కోసం రాంచరణ్ బుల్లితెరపై స్పెషల్ ఎంట్రీ ఇస్తున్నాడు.

అక్కినేని నాగార్జున హోస్ట్ గా వ్యవహరిస్తున్న ‘మీలో ఎవరు కోటీశ్వరుడు’ కార్యక్రమం ఇటీవలే మొదటి సీజన్ విజయవంతంగా పూర్తి చేసుకొని, ఇటీవలే రెండవ సీజన్ ప్రారంభించిన విషయం తెలిసిందే.  ఈ రెండవ సీజన్ కూడా ఎక్కడ బోర్ కొట్టకుండా... మరి అతిగా చేయకుండా... నాగార్జున చాలా చక్కగా ఈ కార్యక్రమాన్ని ముందుకు నడిపిస్తున్నాడు.

ఈ కార్యక్రమంలో మాములు వ్యక్తులతో పాటుగా సెలబ్రెటీలు కూడా పాల్గొంటున్న విషయం తెలిసిందే. అనుష్క, శ్రియ, రకూల్ ప్రీత్ సింగ్, నితిన్, సందీప్ కిషన్, మంచు లక్ష్మీ, కాజల్, విశాల్, శ్రియ, విద్యాబాలన్... వంటి సెలబ్రెటీలు ఏదో సరదగా ఈ కార్యక్రమంలో పాల్గొని, కార్యక్రమానికి మరింత ఉత్సాహాన్ని తెస్తున్నారు.

అయితే తాజాగా ఈ కార్యక్రమానికి మెగాపవర్ స్టార్ రాంచరణ్ రాబోతున్నాడు. ఇటీవలే ఈ ఎపిసోడ్ కు సంబంధించిన షూటింగ్ పూర్తయ్యింది. ఈ వారమే ప్రసారం కానుంది. ఇప్పటివరకు సినిమాల్లో తన నటన, డాన్స్, ఫైట్స్ లతో ఆకట్టుకున్న చరణ్... ఇపుడు మీలో ఎవరు కోటీశ్వరుడు కార్యక్రమంలో ఎలా ఆడనున్నాడోనని అభిమానులు ఎంతో ఆతృతగా ఎదురుచూస్తున్నారు.