ఫ్యాక్షనిస్టుల ‘స్పాట్’ ఫిక్స్ చేసిన వర్మ!

Posted: 11/24/2014 11:31 AM IST

ఎప్పుడూ వివాదాస్పద కామెంట్లు చేస్తూ తనకంటూ ఒక ప్రత్యేక గుర్తింపు తెచ్చుకున్న రాంగోపాల్ వర్మ... తాజాగా మరో సంచలనానికి నడుం బిగించాడు. వరుసబెట్టి సినిమాలు తీస్తున్న ఈ డైరెక్టర్.. ఈసారి ఫ్యాక్షనిస్టుల ‘‘స్పాట్’’ను ఫిక్స్ చేశాడు. ఇదివరకే అతను తెరకెక్కించిన రక్తచరిత్ర సినిమాకు సంబంధించి మరొక పార్ట్ ను తీసేందుకు అన్ని ఏర్పాట్లు సిద్ధం చేసుకున్నాడు. అయితే ఈ చిత్రాన్ని ‘రక్తచరిత్ర’ తరహాలో కాకుండా ఒక ప్రముఖవ్యక్తిని ఏ విధంగా హత్య చేశారో..? అందుకు గల కారణాలేంటి..? ఎలా చంపారు..? చంపిన వ్యక్తులు ఎవరు..? అన్న వ్యవహారాలను కళ్లకు కట్టినట్లు తెరకెక్కిస్తానని పేర్కొంటున్నాడు.

‘స్పాట్’ సినిమాకు సంబంధించి వర్మ కొన్ని విషయాలను కూడా వెల్లడించాడు. అందులో తాను ఏ కథతో తీస్తున్నాడో మొత్తం తెలియజేశాడు. ఆ సినిమాగురించి వర్మ మాట్లాడుతూ.. ‘‘మామూలుగా ఎవరినన్నా చంపాలి అనుకుంటే వారికి స్పాట్ పెట్టాలంటారు. రాయలసీమ ఫ్యాక్షనిస్టుల నుంచి ఈ పదం బాగా ఫేమస్ అయ్యింది. స్పాట్ అనేది అందరూ ఈజీగా అనేస్తారు కానీ ఒక స్పాట్ పెట్టాలి అంటే దాని వెనుక ఎంత శ్రమ ఉంటుందనేది ఎవరూ ఊహించలేరు. ఆ విషయాలను  తెలుసుకున్న నేను షాక్ అయ్యాను. అందుకే రక్త చరిత్ర 1 లో పదే నిమిషాలు ఉన్న ఓబుల్ రెడ్డి హత్యని ఇప్పుడు పూర్తి సినిమాగా తీయడానికి నిర్ణయించుకున్నాను’’ అని తెలిపాడు.

అలాగే.. ‘‘ఓబుల్ రెడ్డికి స్పాట్ పెట్టడానికి గల కారణం, అసలు వ్యక్తుల్ని, ఆ స్పాట్ వల్ల వచ్చిన పరిస్థితులను తెలుసుకున్నప్పుడు నాకు రోమాలు నిక్క బొడుచుకున్నాయి. అందుకే ఈ సినిమాకి ‘‘స్పాట్’’ అనే టైటిల్ పెట్టి ఓబుల్ రెడ్డి స్పాట్ ని సినిమాగా తీస్తున్నాన’’ని పేర్కొన్నాడు. ఏ విధంగా అయితే మహాభారతంలోని ఒక్కొక్క అధ్యాయాన్ని సినిమాగా తెరకెక్కించారో.. అదేవిధంగా పరిటాలరవి అభ్యర్థులు ఓబులరెడ్డిని ఎలా చంపారన్నది పూర్తిగా విశ్లేషించి ఈ సినిమాను తీస్తున్నానని పేర్కొంటున్నాడు వర్మ!

AS