కత్తిపై దాడులు.., విడుదలపై అనుమానాలు

Posted: 10/21/2014 12:52 PM IST

తమిళ స్టార్ హీరో విజయ్ నటించిన ‘కత్తి’ సినిమా తమిళనాడులో తీవ్ర ఉద్రిక్తతలకు దారితీస్తోంది. సినిమా విడుదల తేది ఈనెల 23 (తమిళనాడులో) ప్రకటించినా విడుదలపై అనుమానాలు వ్యక్తం అవుతున్నాయి. పలు సంఘాల హెచ్చరికలతో థియేటర్ల యాజమాన్యాలు సినిమాను తీసుకోవాలంటే భయపడుతున్నాయి. అందువల్లే ‘కత్తి’ని ప్రదర్శించే థియేటర్లు ఏవో కూడా ఇంకా తెలియటం లేదు.

ఇదిలా ఉండగా.., సోమవారం రాత్రి చెన్నైలోని సత్యం మల్టీప్లెక్స్ పై ఆందోళనకారులు రాళ్లు రువ్వారు. దీంతో అద్దాలు ద్వంసం అయ్యాయి. థియేటర్, టికెట్ కౌంటర్లలోకి కిరోసిన్ బాంబులను విసిరేశారు. దీంతో ఒక్కసారిగా ఉద్రిక్తతలు తలెత్తాయి. వెంటనే అప్రమత్తమైన సిబ్బంది మంటలను ఆర్పివేశారు. అదృష్ట వశాత్తు ఈ దాడిలో ఎవరికి గాయాలు కాలేదు. ఈ దాడిపై స్పందించేందుకు, నిరసన తెలిపేందుకు కూడా ఎవరూ ముందుకురాకపోవటం చూస్తేనే పరిస్థితి ఏమిటో అర్ధం అవుతుంది.

లైకా ప్రొడక్షన్స్ సంస్థ నిర్మించిన ఈ సినిమా మొదటి నుంచి వివాదాస్పదం అవుతున్న విషయం తెలిసిందే. ప్రొడక్షన్స్ సంస్థలో భాగస్వామిగా ఉన్న ఒకరు శ్రీలంక అధ్యక్షుడు రాజపక్సేకు సన్నిహితుడు కావటం వివాదానికి కారణం అయింది. లంక అంటే ఒంటికాలిపై లేచే తమిళ ప్రజలు.., తమ పౌరులను క్రూరంగా హింసించిన రాజపక్సే సన్నిహితుడితో సినిమా చేయటాన్ని జీర్ణించుకోలేకపోతున్నారు. అందువల్లే ఎవరు ఎన్నిచెప్పినా.., ఎంత బ్రతిమిలాడినా సినిమాను మాత్రం విడుదల కానివ్వము అని తెగేసి చెప్తున్నారు. మనోభావాలతో ముడిపడిన ఈ వివాదం ఎటు వెళుతుందో చూడాలి.

కార్తిక్