కలెక్టర్ అవతారం ఎత్తబోతున్న రజినీ

Posted: 07/02/2014 06:51 PM IST

సౌత్ ఇండియా సూపర్ స్టార్ రజినీకాంత్ ఇటీవలి కాలంలో నటిస్తున్న సినిమాల్లో డ్యూయల్ రోల్స్ పోషిస్తున్నాడు. ఇటీవల వచ్చిన ‘కొచ్చాడయాన్ ’ సినిమా లో రాణా, విక్రమసింహా పాత్రల్ని పోషించి మెప్పించాడు. ఆ సినిమా బాక్సాఫీసు వద్ద అనుకున్న విజయాన్ని సాధించకపోయినా, రజినీ నటనకు మంచి మార్కులే పడ్డాయి. ఆ చిత్రం తరువాత కేఎస్ రవికుమార్ దర్శకత్వంలో ‘లింగా ’ చిత్రంలో నటిస్తున్నాడు. ఈ చిత్ర షూటింగ్ ప్రస్తుతం హైదరాబాద్ లో శరవేగంగా జరుగుతుంది. ఈ చిత్రానికి సంబంధించిన ఆసక్తికరమైన వార్త ఒకటి బయటకు వచ్చింది.

ఈ చిత్రంలో  రజినీ పోషిస్తున్న ఈ రెండు పాత్రల్లో ఒకటి జిల్లా కలెక్టర్ పాత్ర కాగా, మరొకటి ఫ్లాష్బ్యాక్లో వచ్చే పాత్ర అని, అయితే ఆ రెండో పాత్ర ఏంటన్న విషయాన్ని మాత్రం రహస్యంగానే ఉంచారని ఆ సినిమా వర్గాలు తెలిపాయి. రజినీకాంత్ సరసన ప్రముఖ నటుడు శత్రుఘ్న సిన్హా కూతురు సోనాక్షి నటిస్తుంది. ఈ చిత్రంలో జగపతిబాబు కూడా ఓ కీలకపాత్రలో నటిస్తున్నారు. కేఎస్ రవికుమార్ దర్శకత్వం వహించిన ఈ చిత్రానికి ఏఆర్ రెహమాన్ స్వరాలు అందిస్తున్నారు . ఈ సినిమాకు సంబంధించిన ఆసక్తికర విషయాల్ని మరిన్ని అందిస్తూనే ఉంటాం కాబట్టి చదువుతూనే ఉండండి తెలుగు విశేష్.