రాజమౌళికి మరో గౌరవం దక్కింది

Posted: 11/20/2013 09:25 PM IST

దర్శకుడు రాజమౌళి పేరు ఈ మధ్య కాలంలో మన దేశంలోనే కాకుండా విదేశాల్లో కూడా మార్మోగుతుంది. ఇప్పటికే ఆయన దర్శకత్వం వహించిన ‘ఈగ ’ సినిమా ఎన్నో అంతర్జాతీయ చలన చిత్రాల్లో అవార్డులు సొంతం చేసుకున్న విషయం తెలిసిందే. తాజాగా ఇతనికి మరో అరుదైన గౌరవం దక్కింది. చాలాకాలం క్రితం నితిన్‌ హీరోగా రాజమౌళి ‘సై’ అనే సినిమా తెరకెక్కించిన విషయం విదితమే. ఈ సినిమాకు ఇప్పుడు అంతర్జాతీయ స్థాయి గుర్తింపు దక్కింది. ఈయన రూపొందించిన ఆ సినిమాలో ప్రధాన అంశంగా రగ్బీ క్రీడను ఎంచుకున్నాడు.

ఈ ఆట నేపథ్యంలో ఇప్పటి వరకు ప్రపంచ వ్యాప్తంగా మూడే మూడు సినిమాలొచ్చాయట. ఈ సినిమాను భారత రగ్బీ కోచ్ విల్లీ హటేరక చూడటం దానికి ముగ్దుడు కావడం జరిగాయట. ఆయన వెంటనే అంతర్జాతీయ రగ్బీ బోర్డ్‌ ప్రమోషన్‌ కార్యక్రమం కోసం రాజమౌళి పేరుని ప్రతిపాదించడం జరగటం, ఆ ప్రమోషన్‌ కోసం రాజమౌళిని దర్శకుడిగా అంతర్జాతీయ రగ్బీ బోర్డ్‌ ఎంచుకొవడం జరగిందని స్వయంగా దర్శకధీరుడే ఈ విషయాన్ని ట్విట్టర్లో పంచుకొని తన అభిమానులను ఖుషీ చేశాడు. ఏమైనా ఎప్పుడో ఏడేళ్ళ క్రితం వచ్చిన సినిమాకు ఇప్పుడు అంతర్జాతీయ గుర్తింపు రావడం అంటే ఆశ్చర్యమే కదా.