వంశీ దర్శకత్వంలో పవన్

Posted: 09/14/2013 06:07 PM IST

టాలీవుడ్ స్టార్ హీరోలతో ఒక్క సినిమా అయినా చేసి నాలుగు రాళ్లు, కాసింత పేరు తెచ్చుకోవాలని అనుకుంటారు దర్శక నిర్మాతలు. ఆ టైం కోసం ఎంతకాలం అయినా ఎదురు చూస్తారు. అలా దాదాపు పది సంవత్సరాల నుండి ఎదరు చూస్తున్నాడు ప్రముఖ నిర్మాత దిల్ రాజు. ఇప్పుడు ఆ కల త్వరలో నెరవేర బోతుంది. పవన్ కళ్యాణ్ హీరోగా వంశీ పైడిపల్లి ఓ సినిమాను తెరకెక్కించడానికి సన్నాహాలు చేస్తున్నాడట. మెగా ప్యామిలీ హీరోలు హీరోయిన్లనే కాకుండా దర్శక నిర్మాతలను కూడా పంచుకుంటారు. మొన్నటికి మొన్న వంశీ పైడిపల్లి చరణ్ తో ఎవడు సినిమాను తీశాడు. ఇప్పుడు ఆ దర్శకుడిని పవన్ కళ్యాణ్ పంచుకోబోతున్నాడు. ఇప్పటికే దిల్ రాజు క్యాంపులో ఉన్న వంశీని తీసుకొని వెళ్లి పవన్ కి ఓ స్టోరీ వినిపించాడట. ఆ స్టోరీ పవన్ కి బాగా నచ్చడంతో ప్రస్తుతం ‘గబ్బర్ సింగ్ 2 ’ చిత్రం తరువాత వంశీ పైడిపల్లి దర్శకత్వంలోనే సినిమా ఉంటుందని సినిమా వర్గాల సమాచారం. అన్నీ అనుకున్నట్లుగా జరిగితే దిల్ రాజుకు, వంశీకి బంపర్ ఆఫర్ తగిలినట్లే.