Posted: 10/27/2012 05:35 PM IST

      

‘‘మా బ్రాహ్మణుల వేష భాషలను హస్యానికి వాడుకుంటారా ! బ్రాహ్మణుడి చేత హలీం తినిపించి మా కులాన్ని అవమాన పరుస్తారా  ! మేం అభ్యంతరం తెలిపిన సన్నివేశాలు వెంటనే తొలగించండి. లేకుంటే తీవ్ర పరిణామాలు ఎదుర్కోక తప్పదు’’ అని ఆంధ్రప్రదేశ్ బ్రాహ్మణ సేవా సంఘం సమాఖ్య రాష్ట్ర యువజన అధ్యక్షుడు ద్రోణంరాజు రవికుమార్ ఫైరయ్యారు. నేపథ్యం ఏమిటంటే... విష్ణు – హన్సిక జంటగా నటించిన ‘దేనికైనా రెడీ’  విజయం సాధించిందని హీరో దర్శక నిర్మాతలు ఆనందంగా ఉంటే ఈ ఆరోపణలు వచ్చిపడ్డాయి. ఇటీవల ఎ ఉమెన్ ఇన్ బ్రాహ్మణిజం సినిమా మీద ఆగ్రహంగా ఉన్న బ్రాహ్మణ సంఘాలు అంతలోనే ఈ సినిమా రావడంతో మరింత ఆగ్రహంగా ఉన్నాయి.

     ఈ సినిమాలోని కొన్ని అభ్యంతరకర సన్నివేశాలను వెంటనే తొలగించాలంటూ బ్రాహ్మణ సేవా సంఘాలు ఆగ్రహాన్ని వ్యక్తం చేస్తున్నాయి. విష్ణు - హన్సిక జంటగా జి.నాగేశ్వర రెడ్డి తెరకెక్కించిన ఈ సినిమాలో, తమ కులాన్ని కించపరిచే సన్నివేశాలు ఉన్నాయంటూ బ్రాహ్మణ సేవా సంఘాలు ఈ రోజు హైదరాబాద్ - సోమాజీగూడా ప్రెస్ క్లబ్ లో విలేకరుల సమావేశాన్ని ఏర్పాటు చేశాయి. ఈ సందర్భంగా ఆంధ్రప్రదేశ్ బ్రాహ్మణ సేవా సంఘం సమాఖ్య రాష్ట్ర యువజన అధ్యక్షుడు ద్రోణంరాజు రవికుమార్ మాట్లాడుతూ, బ్రాహ్మణుల వేష భాషలను హాస్యానికి వాడుకోవడం పట్ల తీవ్రమైన అభ్యంతరాన్ని తెలియజేశారు. ఈ సినిమాలో బ్రాహ్మణుడి చేత మాంసం - హలీం తినిపించడం తమ కులాన్ని అవమానపరచడమేనంటూ మండి పడ్డారు. తాము అభ్యంతరం తెలిపిన సన్నివేశాలను తక్షణమే తొలగించాలంటూ డిమాండ్ చేశారు. లేదంటే తీవ్రమైన పరిణామాలను ఎదుర్కోవలసి వస్తుందని హెచ్చరించారు.

...avnk