జింజర్ వాటర్ తో బరువు తగ్గండిలా

Posted: 05/18/2016 06:19 PM IST

నిత్యం మన వంటల్లో ఎక్కువగా ఉపయోగించే అల్లంలో ఎన్నో ఔషధ గుణాలు దాగి ఉన్నాయి. యాంటీ బాక్టీరియల్, యాంటీ ఆక్సిడెంట్, యాంటీ ఇన్‌ఫ్లామేటరీ వంటి ధర్మాలతోపాటు ఎన్నో రకాల విటమిన్స్, మినరల్స్, ఇతర పోషకాలు అల్లంలో ఉన్నాయి. ఇవన్నీ మనకు తెలిసినవే. అయితే అల్లంలో బరువు తగ్గించే, కొవ్వును కరిగించే గుణాలు కూడా ఉన్నాయని మీకు తెలుసా? తెలీదా? కానీ ఇది నిజమేనండీ. అల్లంను ఉపయోగించి తయారు చేసే జింజర్ వాటర్‌ను తాగడం వల్ల కొవ్వు కరుగుతుందట. ప్రధానంగా పొట్ట, నడుము, తొడల వంటి భాగాల్లో అధికంగా పేరుకుపోయిన కొవ్వు సులభంగా కరుగుతుందట. అంతేకాదు, దీని వల్ల బరువు కూడా తగ్గుతారట. ఈ క్రమంలో జింజర్ వాటర్‌ను ఎలా తయారు చేసుకోవాలో చూడండి.

అల్లం కొమ్మును చిన్న చిన్న ముక్కలుగా కట్ చేసుకోవాలి. అనంతరం ఆ ముక్కలను నీటిలో వేసి హై హీట్ మీద మరిగించాలి. ఇలా 10 నిమిషాలు మరిగించాక సిమ్మర్‌లో ఉంచి మరో 15 నిమిషాలు నీటిని మరిగించాలి. అనంతరం వచ్చే మిశ్రమాన్ని చల్లార్చి వడకట్టాలి. దీన్ని రోజులో ఎప్పుడైనా తాగవచ్చు. అయితే కనీసం 1 లీటరు వరకైనా జింజర్ వాటర్‌ను తాగాలి. నిత్యం ఈ వాటర్‌ను తాగుతుంటే కొద్ది రోజుల్లోనే అధికంగా పేరుకుపోయిన కొవ్వు కరగడం మొదలవుతుంది. దీంతో బరువు కూడా తగ్గుతారు.