కురుల సౌందర్యాన్ని మెరుగుపరిచే బెస్ట్ రెమెడీస్

Posted: 10/15/2015 01:55 PM IST

మహిళల చర్మసౌందర్యానికి కురులు మరింత అందాన్ని చేకూరుస్తాయి. మిళమిళ మెరిసే జుట్టు వారి సౌందర్యానికి తోడై.. అందంగా కనిపించేలా చేస్తాయి. అందుకే.. జుట్టును నిత్యం సంరక్షించుకోవడం కోసం మహిళలు చాలా ప్రయత్నాలు చేస్తుంటారు. కానీ.. ప్రస్తుత ఆధునిక యుగంలో వాతావరణ కాలుష్య ప్రభావం జుట్టును నిర్జీవంగా మార్చేయడంతోపాటు వివిధ ఇబ్బందుల్ని తెచ్చిపెడుతోంది. ఇలాంటి సమయాల్లో జుట్టును రక్షించుకోవాలంటే.. బ్యూటీ ప్రోడక్ట్స్ వినియోగించడం కంటే ఇంట్లో చేసుకునే రెమెడీలే ఎంతో శ్రేయస్కరం. మరి.. ఆ రెమెడీలేంటో తెలుసుకుందామా..

* నిమ్మకాయ-పాలు : ఒక పాత్రలో రెండు కప్పుల పాలు తీసుకుని.. అందులో ఒక నిమ్మకాయ రసం వేసి బాగా కలుపుకోవాలి. ఈ మిశ్రమాన్ని జుట్టుకు పట్టించాలి. కుదుళ్లకు, జుట్టుకు రాసుకుని.. అరగంట తర్వాత కడిగేసుకోవాలి. నిమ్మకాయలోని పోషకాలు జుట్టు ఆరోగ్యాన్ని పెంచుతాయి. అలాగని.. నిమ్మకాయని ఎప్పుడూ డైరెక్ట్ గా అప్లై చేయకూడదు. ఏదైనా ఇతర పదార్థంలో నిమ్మను జోడించి, జుట్టుకు పట్టిస్తే మంచిది.

* తేనె-ఆలివ్ ఆయిల్ : ఒక గాజుపాత్ర తీసుకుని అందులో తేనె, ఆలివ్ ఆయిల్ రెండింటిని వేసి మిశ్రమంలా కలుపుకోవాలి. ఈ మిశ్రమాన్ని తలకు పట్టించి.. అరగంట తర్వాత కడిగేసుకోవాలి. ఇలా కొన్నాళ్లపాటు రెగ్యులర్ గా చేస్తే.. జుట్టు మృదువుగా తయారవడమే కాదు.. చివర్లు కూడా చిట్లిపోకుండా.. సిల్కీగా మెరిసిపోతాయి.

* అవకాడో : అవకాడో గుజ్జు తీసి.. దానికి ఒక టేబుల్ స్పూన్ పాలు కలపాలి. ఈ మిశ్రమాన్ని జుట్టుకు పట్టించి.. 15 నిమిషాల తర్వాత శుభ్రం చేసుకోవాలి. ఇలా చేయడం వల్ల జుట్టులో వుండే మలినాలు పూర్తిగా తొలగిపోయి.. మిళమిళ మెరుస్తాయి.

* కోడిగుడ్డు : గుడ్డులోని తెల్లసొన, టీ డికాషన్ తీసుకుని రెండింటిని బాగా కలపాలి. ఈ మిశ్రమాన్ని జుట్టుకి అప్లై చేస్తే.. పొడిబారిన, గరుకుగా మారిన జుట్టుకు గుడ్ బై చెప్పవచ్చు. బ్లాక్ టీ కురులకు సహజ మెరుపుని రంగుని అందిస్తుంది.