అందాన్ని రెట్టింపు చేసే క్యారెట్

Posted: 08/24/2015 03:48 PM IST

Carrot beauty benefits home remedies skincare tips

క్యారెట్ లో ఎన్నో ఔషధగుణాలు దాగి వుంటాయని నిపుణులు ఎన్నోసార్లు తమ పరిశోధనల ద్వారా వెల్లడించారు. ఈ క్యారెట్ ఆరోగ్యాన్ని మెరుగుపరచడంతోపాటు అందాన్ని రెట్టింపు చేస్తుందని వారు పేర్కొంటున్నారు. ఈ క్యారెట్ లో బీటా కెరోటీన్లూ, విటమిన్ ఎ, విటమిన్ సి, విటమిన్ కె తదితర పోషకాలు పుష్కలంగా ఉంటాయి. ఇవి శరీరానికి శక్తిని అందించడంతోపాటు చర్మానికి మెరుపును కూడా ఇస్తాయి. ఇన్ని సుగుణాలు కలిగివున్న ఈ క్యారెట్ తో వివిధ రకాల రెమెడీలు చేసుకుని చర్మానికి పట్టిస్తే.. సౌందర్యం మీ సొంతం.

* ఒక పాత్ర తీసుకుని అందులో నాలుగు స్పూన్ల క్యారెట్ గుజ్జు వేయాలి. ఆ తర్వాత అందులో రెండు స్పూన్లు బొప్పాయి గుజ్జు, కొద్దిగా పాలూ వేసి బాగా కలుపుకోవాలి. ఈ మిశ్రమాన్ని ముఖానికి పట్టించి గంట సేపు అలాగే వుంచుకోవాలి. అనంతరం గోరువెచ్చని నీళ్లతో కడుక్కోవాలి. ఇలా రెగ్యులర్ గా చేస్తే.. మిళమిళ మెరిసే ముఖ సౌందర్యం మీ సొంతం.

* రెండు టీ స్పూన్ల క్యారెట్ రసంలో సగం అరటి పండు గుజ్జు, గుడ్డులోని తెల్లసొన, నాలుగు చుక్కల నిమ్మరసం వేసి బాగా కలుపుకోవాలి. ఈ మిశ్రమాన్ని ముఖంపై అప్లై చేసుకోవాలి. 20 నిముషాల తర్వాత గోరువెచ్చని నీళ్లతో కడిగేయాలి. ఈ ప్యాక్ వల్ల ముఖం మీద మూడతలు మాయమవుతాయి.

* రెండు స్పూన్ల క్యారెట్ రసంలో ఒక స్పూన్ తేనె, చిటికెడు దాల్చిన చెక్కా వేసి బాగా కలపాలి. ఈ పేస్టును ముఖానికి రాసి ఇరవై నిమిషాల తర్వాత నీళ్లతో కడిగేయాలి. దీనివల్ల మొటిమలు మాయమవడమే కాక ముఖ తేజస్సు మెరుగుపడుతుంది.

* ఒక టీస్పూన్ క్యారెట్ రసంలో ఒక టీస్పూన్ తేనెను వేసి బాగా కలుపుకోవాలి. ఈ మిశ్రమాన్ని ముఖానికి పట్టించి, పావుగంట తరువాత కడిగేయాలి. ఈ విధంగా వారానికి మూడు సార్లు చేస్తే ముఖం తాజాగా మారుతుంది.