జుట్టు సమస్యలకు చెక్ పెట్టే ‘ఉసిరి’

Posted: 06/24/2015 01:32 PM IST

పోషకాహారలోపంతోపాటు వాతావరణ కాలుష్యం వల్ల జుట్టు సంబంధిత సమస్యలు వస్తాయి. అప్పుడు జుట్టు పొడిపొడిగా మారిపోయి, రాలిపోవడం.. త్వరగా తెల్లబడిపోవడం వంటి సమస్యలు ఎదురవుతాయి. అటువంటి సమస్యల్ని ఎదురుకోవాలంటే కొన్ని సింపుల్ రెమెడీలు అందుబాటులో వున్నాయి. అవి ఎంతో సమర్థవంతంగా పనిచేసి.. జుట్టు సమస్యల్ని అరికడుతాయి. అలా ఎఫెక్టివ్ గా పనిచేసే రెమెడీల్లో ఉసిరికాయ ఎంతో ఉత్తమమైంది.

ఉసిరి నూనె, హెయిర్ ప్యాక్ వల్ల తలలో రక్తప్రసరణ మెరుగుపడుతుంది. ఇది హెయిర్ ఫోలి సెల్స్ కు ఆక్సిజన్, న్యూట్రీషియన్స్ ఎక్కువగా అందిస్తుంది. తద్వారా జుట్టును హెల్తీగా, బ్యూటిఫుల్ గా వుండటంతోపాటు త్వరగా జుట్టు పెరుగుదలను ప్రోత్సహిస్తుంది. అంతేకాదు.. ఈ ఉసిరి చుండ్రు, ఫంగల్ ఇన్ఫెక్షన్, డ్రైహెయిర్ వంటి సమస్యల్ని నివారించడంతోపాటు జుట్టును స్ట్రాంగ్ గా వుంచుతుంది. అలాంటి ఈ ఉసిరితో రకరకాల రెమెడీలు చేసుకుని జుట్టుకు పట్టిస్తే ఎంతో శ్రేయస్కరం.

జుట్టు సమస్యలకు చెక్ పెట్టే ఉసిరి రెమెడీలు :

* ఆమ్లా జ్యూస్-ఎగ్ ప్యాక్ : మూడు ఉసిరికాయలను తీసుకుని వాటిని మధ్యలో కట్ చేయాలి. అనంతరం వాటిని జ్యూసర్ లో వేసి జ్యూస్ చేయాలి. ఈ జ్యూస్ ను ఒక గిన్నెలోకి తీసుకొని అందులో గుడ్డు వేసి బాగా మిక్స్ చేయాలి. ఈ మిశ్రమాన్ని జుట్టుకు పొడవునా అప్లై చేయాలి. 20 నిముషాల తర్వాత చల్లటి నీటితో శుభ్రం చేసుకోవాలి. ఇలా చేస్తే జుట్టు పెరుగుదల వేగంగా పెరుగుతుంది.

* ఆమ్లా పౌడర్ : ఫ్రెష్ గా ఉండే ఆమ్లాను చిన్న ముక్కలుగా కట్ చేసుకోవాలి. అనంతరం ఆ ముక్కలను ఎండలో బాగా ఎండబెట్టుకోవాలి. బాగా ఎండిన తర్వాత వాటిని మిక్సీలో వేసి మెత్తగా పౌడర్ చేసుకోవాలి. ఈ ఉసిరికాయ పౌడర్ ను ఇతర నేచురల్ పదార్థాలతో మిక్స్ చేసి హెయిర్ ప్యాక్ గా జుట్టుకు వేసుకోవచ్చు. హెయిర్ ప్యాక్ వేసుకున్న అరగంట తర్వాత తలస్నానం చేసుకోవాలి.

* ఆమ్లా పౌడర్-కొబ్బరి నూనె : ఒక పాత్ర తీసుకుని అందులో ఒక టేబుల్ స్పూన్ ఆమ్లా పౌడర్ వేసుకోవాలి. ఆ పౌడర్ లో రెండు టేబుల్ స్పూన్ల గోరువెచ్చని కొబ్బరి నూనె వేసి బాగా మిక్స్ చేసుకోవాలి. గోరువెచ్చగా వున్నప్పుడే ఈ మిశ్రమాన్ని తలకు, జుట్టుకు పట్టించుకోవాలి. 10 నిముషాలవరకు బాగా మసాజ్ చేసుకోవాలి. రెండు గంటల తర్వాత షాంపుతో తలస్నానం చేసుకోవాలి.

* ఆమ్లా పౌడర్-మెంతులు : ఒక గిన్నె తీసుకుని అందులో ఒక చెంచా ఆమ్లా పౌడర్, ఒక చెంచా మెంతి పొడి వేసి మిక్స్ చేసుకోవాలి. ఈ మిశ్రమంలో మూడు టేబుల్ స్పూన్ల ఆముదం వేసి మళ్లీ బాగా కలియబెట్టాలి. ఈ మిశ్రమాన్ని తలకు, వెంట్రుకలకు బాగా పట్టించుకోవాలి. ఇలా పట్టించిన తర్వాత తలకు సున్నితంగా మసాజ్ చేయాలి. అనంతరం ఒక గంట తర్వాత తలస్నానం చేయాలి.

* ఆమ్లా ఆయిల్ : ఉసిరికాయను చిన్నచిన్న ముక్కలుగా కట్ చేసి ఎండబెట్టుకోవాలి. తర్వాత అందులో మూడు చెంచాల మెంతుల పొడి, అరకప్పు కొబ్బరి నూనెలో వేసి బాగా మిక్స్ చేయాలి. మిక్స్ చేసిన తర్వాత ఈ మిశ్రమాన్ని తక్కువ మంట మీద బ్రౌన్ కలర్ వచ్చే వరకూ బాయిల్ చేయాలి. చల్లారిన తర్వాత ఈ ఆయిల్ ని జుట్టుకి పట్టించి, మసాజ్ చేసుకోవాలి. ఇలా రోజూ ఉదయాన్నే పట్టించుకుని గంట తర్వాత తలస్నానం చేయాలి. ఇలా చేయడం వల్ల జుట్టు పెరుగుదల ప్రోత్సహింపబడుతుంది.