కేశాలకు కలబంద

Posted: 02/12/2013 01:44 PM IST

అందం జోలికి వెడితే అణువణువూ అలంకరించుకోవలసిందే. నఖశిఖపర్యంతం చేసుకునే అలంకరణ లో జుట్టుకు మగువలు చాలా ప్రాముఖ్యత ఇస్తారు. ప్రస్తుతం జుట్టు కోసం ఎన్నో రకాల షాంపూలు, ఆయిల్స్‌ వాడుతూ వుంటారు. జట్టు ఎలా ఉన్నా డాండ్రఫ్‌ కనుక తల్లో చొరబడిందంటే, నలుగురిలోను తలగోక్కోకుండావుండలేరు. ఇది చాలా ఇబ్బందికరమైన పరిస్థితి.ఈ డాండ్రఫ్‌ నుంచి బయట పడడానికి ఎన్నో ప్రోడక్ట్స వాడుతుంటారు. అసలు జుట్టు సంరక్షణలో ఇంట్లోనే కొన్ని చిట్కాలు వాడితే సరిపోతుంది. జట్టు విపరీతంగా రాలటం, క్రమంగా తెల్లబడటం లాంటి చికాకులతో బాధ పడేవారికి అలోవేరా (కలబంద) ఆయిల్‌ అద్భుతంగా పనిచేస్తుంది. ఈ నూనెను ప్రతి రోజూ గోరువెచ్చగా చేసి తలలో కుదుళ్లకు బాగా పట్టించి మర్దనా చేసుకుంటే మంచి ఫలితం కనిపిస్తుంది. కలబంద నూనెను ఇంట్లో కూడా తయారు చేసుకోవచ్చు. కలబంద నూనె తయారీకి కావలసిన పదార్ధాలు కలబంద గుజ్జు పావు కేజీ, కొబ్బరి నూనె పావు కేజీ.

తయారుచేయడం:

కలబంద మట్టను తీసుకుని దానిని చీల్చి లోప ఉండే గుజ్జునంతటినీ తీసుకోవాలి. అయితే ఈ గుజ్జు ముద్దలుగా లేకుండా చూసుకోవాలి.ఒక బాణలి తీసుకుని స్టౌవ్‌ పై పెట్టి సన్నని సెగపై ఉంచి అందులో కలబంద గుజ్జును వేసి అడుగంట కుండా కలుపుతూ వుండాలి. అలా ఉడికిస్తుంటే నీరంతా ఆవిరైపోయి నూనె మాత్రమే మిగులుతుంది. దాంట్లో మర్వం గానీ, ధవనం గానీ వేసి కలియబెట్టాలి. ఇవి మంచి సువాసననిస్తాయి. అవిలేకుంటే వేయకపోయినా ఇబ్బంది లేదు. ఇక కలబంద నూనె తయారైనట్లే. దీనిని ప్రతిరోజూ క్రమం తప్పకుండా వాడినట్లయితే జుట్టు రాలటం తగ్గుతుంది. జుట్టు తెల్లబడకుండా ఉంటుంది. ఆయిల్‌ రాసుకునే అలవాటు చాలా మందికి వుండదు. అలాంటి వారు వారానికి ఒక సారి కలబంద గుజ్జును మెత్తగా పేస్ట్‌ చేసి దానిని తలకు బాగా పట్టించి మర్ధనా చేస్తే చాలు. జుట్టు రాలడం తగ్గుతుంది. దీనితో పాటు చుండ్రుకూడా నివారింపబడుతుంది.