హుదూద్ ప్రభావిత ప్రాంతాల్లో ప్రధాని ‘సర్వే’

Posted: 10/14/2014 08:31 AM IST

Prime minister narendra modi is to make an aerial survey

ఆంధ్రప్రదేశ్‌లోని తుపాను ప్రభావిత ప్రాంతాల్లో ప్రధానమంత్రి నరేంద్ర మోదీ ఇవాళ పర్యటించనున్నారు. తుపాను అనంతర పరిస్థితిని అంచనా వేసేందుకు ఆయన ప్రత్యేక విమానంలో విశాఖపట్నానికి చేరుకోనున్నారు. హుదూద్ తుపాను బీభత్సంపై ఆంధ్రప్రదేశ్ ముఖ్యమంత్రి చంద్రబాబుతో మాట్లాడాననీ...ఎప్పటికప్పుడు వివరాలను తెలుసుకున్న ప్రధాని నేరుగా ప్రభావిత ప్రాంతాలను ఏరియల్ సర్వే ద్వారా పరిశీలించనున్నారు. ఆంధ్రప్రదేశ్ తో పాటు ఒడిశాలో కూడా ఆయన ఏరియల్ సర్వే చేపట్టనున్నారు. ఇవాళ మధ్యాహ్నం 1.15 గంటలకు విశాఖ నుంచి ఏరియల్ సర్వే మొదలవుతుంది. ఉత్తరాంధ్రలో తీవ్రంగా నష్టపోయిన ప్రాంతాలను పరిశీలించిన అనంతరం ఆయన ఒడిశా తుఫాను ప్రభావిత ప్రాంతాలను పరిశీలించనున్నారు.

విశాఖపట్నంలో రాష్ట్ర ప్రభుత్వం ఏర్పాటు చేసే ఛాయాచిత్ర ప్రదర్శనలో పాల్గొంటారు. హుదుహుద్ వల్ల రాష్ట్రంలో నష్టపోయిన పంటల విస్తీర్ణం, నివాస గృహాలు, మౌలిక సదుపాయాలకు వాటిల్లిన నష్టం; సమాచార, రవాణా, విద్యుత్ వ్యవస్థ ఎంత దారుణంగా దెబ్బతిన్నదీ ప్రధాని మోదీకి ఏపీ ముఖ్యమంత్రి చంద్రబాబు వివరిస్తారు. అపారంగా నష్టపోయిన రాష్ట్రానికి అండగా నిలిచేందుకు సాయం అందించడంతోపాటు జాతీయ విపత్తుగా ప్రకటించాల్సిందిగా ప్రధాని మోడీని ఇదివరకే కోరిన ముఖ్యమంత్రి మరోమారు ప్రత్యక్షంగా విన్నవించనున్నారు. ప్రాథమిక అంచనాలు ఇంకా రానందున తక్షణ సాయంగా రూ.2వేల కోట్లు అందించాలని విజ్ఞప్తి చేశారు.

జి.మనోహర్