సుప్రీంకోర్టు సీజేగా దత్తు ప్రమాణ స్వీకారం..

Posted: 09/28/2014 01:43 PM IST

సుప్రీంకోర్టు ప్రధాన న్యాయమూర్తిగా జస్టిస్ హండ్యల లక్ష్మీనారాయణస్వామి దత్తు ఇవాళ రాష్ట్రపతి భవన్‌లో ప్రమాణస్వీకారం చేశారు. రాష్ట్రపతి ప్రణబ్ ముఖర్జీ జస్టిస్ హెచ్.ఎల్ దత్తుతో ప్రమాణం చేయించారు. భగవంతుడిపై ప్రమాణం చేసిన అనంతరం దత్తు బాధ్యతలు స్వీకరించారు. గతంలో కేరళ, ఛత్తీస్‌గఢ్ హైకోర్టుల ప్రధాన న్యాయమూర్తిగా పనిచేశారు. సుప్రీంకోర్టు ప్రధాన న్యాయమూర్తిగా దత్తు 14నెలల పాటు పదవిలో కొనసాగుతారు. సుప్రీంకోర్టు ప్రధాన న్యాయమూర్తిగా నిన్న పదవీ విరమణ చేసిన జస్టిస్ ఆర్ ఎం లోధా స్థానంలో ఆయన బాధ్యతలు స్వీకరించారు.

2జీ స్పెక్ట్రమ్ కుంభకోణం కేసు విచారిస్తున్న ధర్మాసనంలో జస్టిస్ దత్తు కూడా వున్నారు. ఈ సందర్భంగా ఆయన మాట్లాడుతు.. తన విధులను నిర్వహించేందుకు ధైర్యం, నమ్మకం కావాలని వీటితో పాటు తనకు దేశ ప్రజల ఆశీర్వచనాలు కావాలని కోరారు. ప్రమాణస్వీకార కార్యక్రమంలో ఉప రాష్ట్రపతి హమీద్ అన్సారీ, కేంద్ర మంత్రులు రాజ్‌నాథ్‌సింగ్, రవిశంకర్‌ప్రసాద్, వెంకయ్యనాయుడు, బీజేపి సీనియర్‌ నేత అద్వానీ, కాంగ్రెస్ నేతలు అభిషేక్ మను సింఘ్వి, రాజీవ్ శుక్లా తదితరులు పాల్గొన్నారు.

జి.మనోహర్