Posted: 01/17/2012 06:49 PM IST

ఈదిదాటగలుగు నే సాగరంబైన

సాధువృత్తితోడ సమయమందు

పాడుకొనుచు మనసు పరిపూర్ణమొందును

విశ్వదాభిరామ వినురవేమ

ఈది దాట గలుగును- ఈదుకుంటూ దాటగలుగుతాడు, ఏ సాగరంబైన- సముద్రమైనా సరే, సాధువృత్తి తోడు- సత్ప్రవర్తనతో, సమయమందు- ఆ సమయానికి తగ్గట్టుగా, పాడుకొనుచు- భక్తి గీతాలు పాడుకుంటూ, మనసు పరిపూర్ణమొందును- మనసునిపరిపూర్ణంగా చేసుకుంటాడు.

సాధుప్రవర్తనతో మెలిగినట్లైతే సమయాన్నిబట్టి ఏ సముద్రాన్నైనా ఈది దాటగలుగుతాడు. భక్తి తత్వాలు మనసులో పాడుకుంటూ తన మనసుని నిర్మలంగా చేసుకోవటం వలన కాలక్రమేణా అది పరిపూర్ణమౌతుంది.

చూడటానికి ఇవి మామూలు సూక్తులలా ఉన్నా ఈ పద్యంలోని పదాలు అత్యంత నిగూఢమైన, లోతైన అర్థాన్ని కలిగివున్నాయి. సాగరం దాటటమంటే నిజంగా సముద్రాన్ని ఈదుకుంటూ అవతలి ఒడ్డుకి పోవటమని కాదు. అది ఎవరికైనా సాధ్యం కాదు కూడా. సముద్రమనేది చాలా లోతైన, ఎత్తైన అధిగమించలేని దాటలేని పరిష్కరించలేని సమస్యకు ప్రతీక. సంసారసాగరం అని అంటారు. జీవితంలో ఆటుపోట్లు, తుఫాన్ చెలరేగటం ఇవన్నీ సముద్రానికి సంబంధించిన మాటలు. జీవితం అగమ్యగోచరంగా దిక్కు తోచకుండా ఉంటే చుక్కాని లేని నావ అని అంటారు. ఇలాంటి పదాలన్నీ జీవితంలో ఉన్న సమస్యలూ మనసులోని సందిగ్ధావస్థలను తెలియజేయటానికి వాడుతారు. అందువలన ఏ సముద్రమైనా దాటటం అని అంటే, ఎటువంటి సమస్యలనైనా అధిగమించటం అని అర్థం వస్తుంది.

మనసు ఎప్పుడూ ఏదో ఒక విషయం మీదికి పరిగెడుతూ ఉంటుంది. అటువంటి మనసుని నియంత్రించటానికి దాని వెనకాల మనం కూడా పరిగెడితే అది జరిగే పని కాదు. ఎగురుతున్న పక్షులను పట్టుకోవటానికి ఎలాగైతే వాటికి కావలసిన దాణా వేస్తారో, జంతువులను పట్టుకోవటానికి దానికి ఇష్టమైన ఆహారాన్ని ఎలాగైతే చూపించి అది దగ్గరకు రాగానే పట్టుకుంటారో అలాగే మనసుని నిశ్చలంగా ఉంచుకోవాలంటే దాన్ని ముందుగా ఏదో ఒక విషయం మీద లగ్నం చేసి ఉంచాలి. అలాంటి ప్రయత్నమే భక్తిగీతాలను మనసులో కానీ బిగ్గరగా కానీ చదువుకోవటం. దానివలన మనసు ముందు నిశ్చలమవుతుంది, ఆ తర్వాత నిర్మలమవుతుంది, ఆ తర్వాత పూర్తిగా లయమవుతుందని కనిపెట్టిన మహాత్ములు మనకూ ఆ సాధనానిచ్చారు. అందుకే పాడుకొనుచు మనసు పరిపూర్ణమగును అంటారు వేమనాచార్యులవారు.

 

-శ్రీజ