Posted: 01/06/2012 03:01 PM IST

విద్యలేనివాడు విద్యాధికుల చెంత

నుండినంత బండితుండు కాడు

కొలని హంసలకడ గొక్కెరయున్నట్టు

విశ్వదాభిరామ వినురవేమ

విద్యలేనివాడు= చదువుకోనివాడు, విద్యాధికులచెంత= చదువుకున్నవారి వద్ద, ఉండినంత= ఉన్నంతమాత్రాన, పండితుండు కాడు= పండితుడైపోడు, కొలని= కొలనులో, హంసల కడ= హంసల దగ్గర కొక్కెరఉన్నట్టు= కొంగ ఉన్నట్టు

హంసల మధ్యలోనే తిరుగాడినా కొంగ ఎప్పటికీ కొంగే. అలాగే చదువుకున్న వాళ్ళ మధ్య తిరుగుతూ కాలం గడిపినంత మాత్రాన విద్యావంతుడనిపించుకోరు.

హంస అనే పక్షిని పురాణాల్లో వర్ణిస్తారు. పూర్వకాలం ఆ జాతి పక్షులుండేవని నమ్మకం. హంసలకుండే లక్షణాలు- స్వచ్చమైన తెల్లదనం, సుందరమైన రూపం, దేవతల పక్షి అనే పేరు, భూమ్మీదనే కాకుండా దేవలోకంలో కూడా విహరిస్తుంటాయని నమ్మకం, స్వచ్ఛతకు మారుపేరైన హంసకి పాలల్లో నీళ్ళు కలిపి ఇచ్చినా అందులోంచి హంస పాలని తాగి నీళ్ళని వదిలిపెట్టగలిగే విశేష సామర్థ్యం. కొంగలు కూడా తెల్లగా ఉన్నా, కొలనుల్లోనే విహరించినా, అది ఎప్పటికీ హంస లక్షణాలను సంతరించుకోలేదు. అలాగని హంసలతో తిరుగుతూ ఉంటే వాటి లక్షణం ఏమైనా అంటుకుంటుందా అంటే అద ఎలా సంభవం.

కష్టపడి విద్యార్జన చెయ్యకుండా కేవలం ఙానులతో తిరిగినంత మాత్రాన ఙానులైపోరెవరూ. వారు మాట్లడే మాటల్లో కొన్ని పట్టుబడవచ్చంతే. చిలక పలికే పలుకుల్లా వాటి అర్థం సరిగ్గా తెలియకుండానే వాటిని ఉపయోగిస్తూవుండవచ్చేమో కానీ, విద్యావంతుడవటానికి అది మార్గం కాదు. విద్యనభ్యసించిన తర్వాత విద్యావంతులతో కలిసి చర్చించుకోవచ్చు కానీ ఏమీ చదవకుండానే ఒట్టిగా వాళ్ళతో తిరిగి ఏదో గడించవచ్చనుకుంటే పొరపాటవుతుందని వేమనాచార్యుల హెచ్చరిక

-శ్రీజ