Cbi Granted Custody Of Nimmagadda Prasad For 10 Days

Posted: 05/18/2012 10:25 AM IST

CBI granted custody of Nimmagadda Prasad for 10 days

పదిహేను రోజుల కస్టడీకి ఇవ్వాలన్న సిబిఐ వాదనను న్యాయస్థానం అంగీకరించలేదు. నిందితులను తమ కస్టడీకి అప్పగించాలని కోరుతూ పిటిషన్‌ దాఖలు చేసిన సిబిఐ వారిద్దరినీ చంచల్‌గూడ జైలు నుంచి కోర్టుకు హాజరుపరిచింది. వైఎస్‌ జగన్‌ అక్రమాస్తుల కేసులో అరెస్టయిన పారిశ్రామికవేత్త నిమ్మగడ్డ ప్రసాద్‌, బ్రహ్మానందరెడ్డిలను 10 రోజులపాటు సిబిఐ కస్టడీకి ఇస్తూ సిబిఐ న్యాయస్థానం ఉత్తర్వులిచ్చింది. ఇరు పక్షాల వాదనలు విన్న న్యాయమూర్తి పది రోజుల కస్టడీకి మాత్రమే అనుమతించారు. ఉదయం 9.30 గంటల నుంచి సాయంత్రం 5.30 గంటల వరకు మాత్రమే నిందితులను విచారించాలని, అదీకూడా వారి న్యాయవాదుల సమక్షంలో మాత్రమేనని న్యాయస్థానం ఆదేశించింది. థర్డ్‌డిగ్రీ ప్రయోగించరాదని స్పష్టం చేసింది. కస్టడీ పూర్తయిన తర్వాత 28వ తేదీ ఉదయం నిమ్మగడ్డ, బ్రహ్మానందరెడ్డిలను తిరిగి న్యాయస్థానంలో హాజరుపరచాలని ఆదేశించింది.

నిమ్మగడ్డ ప్రసాద్‌ వాన్‌పిక్‌ భూమి ద్వారా మూడింతలు ప్రయోజనం పొందారని సిబిఐ తరపు న్యాయవాది వాదించారు. రైతుల నుండి తక్కువ ధరకు భూములు కొన్నారని, వారికి కలెక్టర్‌ ద్వారా డబ్బులు ఇవ్వకుండా, సొంతంగా చెల్లించి 350 కోట్ల రూపాయల ప్రయోజనం పొందారని చెప్పారు. మంత్రివర్గం ఆమోదం లేకుండానే వాన్‌పిక్‌కు భూములు కేటాయించారని, ఆయనను ఈ విషయంపై చాలాసార్లు విచారించినా సమాధానం రాలేదన్నారు.