Posted: 03/02/2012 10:09 AM IST

అక్రమ మైనింగ్‌ కేసులో అరెస్టయి విచారణను ఎదుర్కొంటున్న గాలి జనార్ధన్‌రెడ్డిని సిబిఐ అధికారులు అత్యంత కట్టుదిట్టమైన భద్రత నడుమ చంచల్‌గూడ జైలు నుండి బెంగళూరుకు తరలించారు. రోడ్డు మార్గంలో ప్రయాణిస్తే తనకు ప్రాణహాని ఉందని, హెలికాప్టర్‌లో ప్రయాణించేందుకు అనుమతించాలని కోర్టును కోరానంటూ కారులో ఎక్కనని గాలి జనార్ధన్‌రెడ్డి కొద్దిసేపు మొండికేశారు. హెలికాప్టర్‌లో బెంగళూరుకు తరలించేందుకు సిబిఐ న్యాయస్థానం అంగీకరించలేదని సిబిఐ అధికారులు చెప్పడంతో చివరకు కారులో ఎక్కారు. గాలిని ఒక ఇన్‌స్పెక్టర్‌, ఇద్దరు ఎస్‌ఐలు, ఎనిమిది మంది పోలీసుల భద్రతతో వాహనాల్లో తరలించారు. బెంగళూరుకు తనను హెలికాప్టర్‌లోనే తీసుకువెళ్లాలని గాలి గురువారం ఉదయం నాంపల్లిలోని సిబిఐ న్యాయస్థానంలో పిటిషన్‌ దాఖలు చేశారు. హైదరాబాద్‌ నుంచి బెంగళూరుకు 600 కిలోమీటర్ల దూరం ఉన్నందున తనకు ప్రాణహాని ఉందని, భద్రతా కారణాల దృష్ట్యా హెలికాప్టర్‌లో తీసుకెళ్లాలని విజ్ఞప్తి చేశారు. ఎస్కార్ట్‌తో సహా అయ్యే ఖర్చులన్నీ తానే భరిస్తానని పేర్కొన్నారు. హెలికాప్టర్‌ అవసరం లేదని, గట్టి భద్రతతో గాలిని బెంగళూరుకు తీసుకువెళ్లగలమని సిబిఐ తెలపడంతో గాలి పిటిషన్‌ను కోర్టు కొట్టివేసింది. అక్రమ మైనింగ్‌ కేసులో బెంగళూరులో గాలి జనార్ధన్‌రెడ్డితో సహా 21 మందిపై సిబిఐ అభియోగాలు మోపింది. జనార్ధన్‌రెడ్డిని శుక్రవారం ఉదయం పదిన్నర గంటలకు అధికారులు బెంగళూరులోని సిబిఐ కోర్టులో హాజరుపరచాల్సి ఉంది.