Chiranjeevi In Delhi To Meet Ajad

Posted: 01/13/2012 10:08 AM IST

Chiranjeevi in Delhi to meet Ajad రాష్ట్ర మంత్రి వర్గ విస్తరణలో పీఆర్పీ నేతలకు ఇవ్వాల్సిన మంత్రి పదవులపై ఢిల్లీలో కాంగ్రెస్‌ నేతలు పంచాయతీ పెట్టేందుకు సిద్ధమవుతున్నారు. కాంగ్రెస్‌లో పీఆర్పీ విలీనమైన నాటి నుంచి పార్టీ పరంగా, ప్రభుత్వ పరంగా కీలక పదవులు లభిస్తాయన్న ఆశతో ఆ పార్టీ అధినేతగా ఉన్న చిరంజీవి ఉన్నారు. అయితే రాష్ట్ర కాంగ్రెస్‌ గ్రూపు రాజకీయాల కారణంగా మంత్రివర్గ విస్తరణలో కానీ, కేంద్రంలోగానీ చిరు వర్గానికి పదవులు లభించలేదు. త్వరలోనే మంత్రి వర్గ విస్తరణ ఉంటుందన్న సీఎం ప్రకటనతో ఇప్పుడు మళ్లీ వేడి రాజుకుంది. తమ వర్గానికి చెందిన సీ.రామచంద్రయ్య, గంటా శ్రీనివాస్‌రావులకు మంత్రి పదవులు ఇవ్వాలని చిరు అధిష్ఠానాన్ని కోరుతున్న విషయం తెలిసిందే. సీ.రామచంద్రయ్యకు ఎట్టి పరిస్థితుల్లోనూ మంత్రి పదవి ఇవ్వొద్దంటూ కాంగెస్‌ నేతలు డీఎల్‌, అహ్మదుల్లా, చెంగల్రాయుడు అధిష్ఠానానికి ఫిర్యాదు చేసేందుకు సిద్ధమవుతున్నారు. ఈ క్రమంలోనే వారు ఏపీ కాంగ్రెస్‌ రాష్ట్ర వ్యవహారాల ఇన్‌చార్జి గులాం నబీ ఆజాద్‌తో భేటీ అయ్యేందుకు యత్నిస్తున్నారు. రామచంద్రయ్యకు మంత్రి పదవి ఇవ్వడం వల్ల పార్టీకి తీరని నష్టం జరిగే అవకాశం ఉందని వారు పేర్కొంటున్నారు. రామచంద్రయ్యకు మంత్రి పదవి ఇవ్వాల్సిందేనన్న పట్టుదలతో చిరు ఉన్నారు.చివరికి చిరు కేబినేట్‌ పంచాయతీలో ఎవరు గెలుస్తారో వేచి చూడాల్సిందే.