టీ తాగండి.. ఒత్తిడిని జయించండి!

Posted: 05/11/2015 01:42 PM IST

రోజువారి ఇంటి కార్యకలాపాలతోపాటు అటు ఆఫీసు పనులు కూడా ఎక్కువగా వుండటంతో ప్రతిఒక్కరు ఒత్తిడికి గురి అవుతుంటారు. ఈ ఒత్తిడి కాలక్రమంలో పెరిగితే.. ఎన్నో ఆరోగ్య సమస్యల్ని ఎదుర్కోవాల్సి వస్తుంది. మెదడు సంబంధిత వ్యాధులు, మానసికపరమైన సమస్యలు లేదా గుండెసంబంధిత వంటి ప్రమాదాలు సంభవించే అవకాశం వుంటుంది. కాబట్టి.. ఈ ఒత్తడి సమస్యను తక్షణమే అధిగమించాల్సి వుంటుంది. మరి.. ప్రస్తుత ఫాస్ట్ జనరేషన్ లో ఒత్తిడిని జయించడం ఎలా సాధ్యపడుతుంది? అని అనుకుంటున్నారా! ఇప్పుడు ఆ ఆలోచన లేకుండా నిపుణులు ‘సింపుల్ చిట్కా’ అందిస్తున్నారు.

తీవ్ర ఒత్తిడి సమస్యతో బాధపడుతున్నవారు ఓ కప్పు టీ తాగితే చాలని ఆరోగ్య నిపుణులు అంటున్నారు. ఆ టీ కాస్త తియ్యగా ఉంటే ఇంకా బెటరని పరిశోధనలు సైతం తేల్చాయి. టెన్షన్‌లో ఉన్నప్పుడు తియ్యని టీ తాగిన వారిలో ఒత్తిడి హార్మోన్లు సమతుల్యంగా వుంటాయని.. అదే టీ తాగని వారిలో ఒత్తిడి ఎక్కువుగా ఉన్న విషయం పరిశోధనలో తేలింది. అందుకే.. టీ తాగితే ఆరోగ్యానికి మంచిదని నిపుణులు సలహా ఇస్తున్నారు. కానీ తియ్యటి టీ అనగానే ఎక్కువ మోతాదులో పంచదార ఉపయోగిస్తే మాత్రం లేనిపోని ఇబ్బందులు కొనితెచ్చుకోవాల్సి వస్తుందని.. ఆ విషయంలో కాస్త జాగ్రత్తగా వుండాలని వారు అంటున్నారు.

టీ వల్ల కలిగే ప్రయోజనాలు :
* రోజూ మూడు కప్పుల టీ తాగితే ఆరు యాపిల్ పండ్లు తిన్నదానితో సమానం.
* ఒక టీ కప్పులోని యాంటీ ఆక్సిడెంట్స్ ఒక కప్పు పండ్ల రసం కంటే అధికం.
* ఒత్తిడి, డయాబెటిస్, క్యాన్సర్, దంతక్షయం మొదలగు ఎన్నో రోగాల నుంచి టీ రక్షించగలదు.
* టీ తాగితే వయస్సును కూడా తగ్గిస్తుంది. శరీరం ముడతలు పడకుండా కాపాడుతుంది.
* టీలో పాలు వేసుకొని తాగడం వల్ల శరీరానికి విటమిన్స్, మెగ్నీషియం, పొటాషియం వంటి ఖనిజాలు పొంది ఎముకలు దృఢంగా తయారవుతాయి.
* మెదడు చురుగ్గా పనిచేస్తుంది.