కొబ్బరిలో దాగివున్న పోషక విలువలు

Posted: 04/08/2015 01:44 PM IST

మానవ శరీరానికి అవసరమయ్యే ఆరోగ్యకరమైన పోషక విలువలు కొబ్బరిలో ఎన్నో దాగివున్నాయి. అవి ఆరోగ్యానికి, అందానికీ ఎంతో మేలు. ఈ కొబ్బరిని నిత్యం ఉపయోగిస్తే బహుముఖ ప్రయోజనాలు కలుగుతాయి. ముఖ్యంగా అమృతంలా పనిచేసే కొబ్బరి నీళ్లు, కొబ్బరి పాలల్లో విటమిన్ ఏ, బీ, సీ రిబోఫ్లోవిన్, ఐరన్, క్యాల్షియం, ఫాస్పరస్, కార్బోహైడ్రేట్లు, కొవ్వు, ప్రొటీన్లు సమృద్ధిగా లభిస్తాయి. ఇవి ఎన్నోరకాల హానికారక సూక్ష్మజీవుల నుంచి పోరాడి, ఆరోగ్యంగా వుండేందుకు సహకరిస్తాయి. అలాగే.. రకరకాల చిరుజబ్బులు దరిచేరకుండా కాపాడుతాయి.

కొబ్బరితో కలిగే ఆరోగ్య ప్రయోజనాలు :
 
* బాలింతలకు అధిక రక్తస్రావం ఇబ్బంది పెడుతున్న సమయంలో కొబ్బరి పువ్వు జ్యూస్‌ను తీసుకుంటే వెంటనే ఉపశమనం దొరుకుతుంది.
* సాధారణంగా కొన్ని కొబ్బరికాయల్లో పువ్వు వచ్చే విషయం తెలిసిందే! ఆ పువ్వు గర్భాశయానికి మేలు చేస్తుంది.
* నిత్యం కొబ్బరినీళ్లు తాగితే మూత్రపిండాల సమస్యలు దరిచేరవు. శరీరానికి చల్లదనం లభిస్తుంది.
* గొంతు మంట, నొప్పిగా ఉన్నప్పుడు కొబ్బరిపాలు తాగితే సరిపోతుంది.
* కొబ్బరి నూనెలో యాభై శాతం లారిక్ ఆమ్లం ఉంటుంది. దీన్ని వంటల్లో అధికంగా ఉపయోగిస్తే గుండెకు రక్తప్రసరణ సక్రమంగా జరుగుతుంది. కొవ్వుశాతం పెరగదు. రక్తపోటు నియంత్రణలో ఉంటుంది.
* కొబ్బరి నూనెలో విటమిన్ ఈ అధికం. ఇది చర్మాన్ని కోమలంగా ఉంచుతుంది. రోజుకు రెండు చెంచాల నూనె తీసుకుంటే జీర్ణవ్యవస్థకు మంచిది. థైరాయిడ్ సమస్య ఉండదు.
* పొడి చర్మం ఉన్నవారు పచ్చికొబ్బరి తీసుకుంటే శరీరానికి సరిపడా తేమ అందుతుంది.
* కొబ్బరిపాలు చర్మానికి పట్టిస్తే మృతకణాలు, మురికి తొలగిపోతుంది. శరీర చర్మం ప్రకాశవంతంగా మెరుస్తుంది. ఇది జుట్టుకూ మేలు చేస్తుంది.
* జుట్టు కాంతివిహీనంగా కనిపిస్తుంటే ఇలా చేయండి. కొబ్బరిపాలను తలకు పట్టించి అరగంట పాటు మర్దన చేయాలి. దీనివల్ల శిరోజాలు పట్టుకుచ్చుల్లా జాలువారతాయి. కొత్త నిగారింపును సంతరించుకుంటాయి.