స్నేహితులను ఎంత వరకు చేరుకోగలుగుతున్నాం

Posted: 11/30/2013 09:18 PM IST

నేటి విద్యార్థులు చదువులో పడిపోయి స్నేహాన్ని మరిచిపోతున్నారు. కేవలం ఫేస్‌బుక్‌ల ద్వారానో, చాటింగ్‌ల ద్వారానో మాత్రమే స్నేహబంధాన్ని ఏర్పరుచుకోలేరు. మంచి స్నేహం చేయాలంటే ఏం చేయాలి? అంటే- మిమ్మల్ని అభిమానించే, అర్థం చేసుకునే వాళ్లతో స్వేచ్ఛగా మాట్లాడండి. మిమ్మల్ని మీరు వ్యక్తీకరించుకోండి. సామాజిక, వ్యక్తిగత అంశాల మీద చర్చలు వచ్చినప్పుడు.. అవతలివాళ్ల మనసును నొప్పించకుండా మీదైన వాదనను వినిపించవచ్చు. కొన్నిసార్లు స్నేహితుల మనసు నొచ్చుకునే సందర్భాలూ రాకపోవు.

అలా జరిగిన వెంటనే సారీ చెప్పడంలో తప్పులేదు. ఇద్దరి మధ్య ఏ చిన్న కలత ఏర్పడినా వెంటనే తొలగించుకోవడం ఉత్తమం. స్నేహాన్ని మరింత బలోపేతం చేసుకునేందుకు వేడుకలు, శుభాకాంక్షలు, బహుమతులు ఎంతగానో ఉపయోగపడతాయి. వీలైనంత వరకు వాటికి స్పందించండి. స్నేహితుల గురించి మీ తల్లిదండ్రులతో చెప్పడమే కాదు. అప్పుడప్పుడు ఇంటికి ఆహ్వానించి ఆతిథ్యం ఇవ్వండి. మీరు కూడా వాళ్లింటికి వెళ్లి పెద్దలను పరిచయం చేసుకోండి. స్నేహాన్ని గ్రీటింగ్ కార్డులకో, ఫేస్‌బుక్, చాటింగ్‌లకో పరిమితం చేస్తే ఉపయోగం లేదు. ఏదైనా అనుకోని కష్టం కలిగినప్పుడు మీ శక్తిమేరకు సాయం చేయండి. అదే పరిస్థితి మీకొస్తే మీ స్నేహితుల సాయాన్ని కోరడంలోనూ తప్పులేదు.