వీరూ ట్వీట్ మళ్లీ వైరల్.. హ్యాట్సాఫ్ రిక్షావాలా తనయ..

ఒకప్పటి టీమిండియా డాషింగ్ ఓపెనర్ వీరేంద్ర సెహ్వాగ్ మైదానంలో అభిమానులను అలరించడం ఆపేశారు కానీ.. ట్విట్టర్‌లో మాత్రం కొనసాగిస్తూనే ఉన్నారు. ట్విట్టర్‌లో యాక్టివ్‌గా ఉండే సెహ్వాగ్.. రోజూ ఏదో ఒక ఆసక్తికర ట్వీట్ చేస్తూనే ఉంటారు. గురువారం కూడా ఒక అద్భుతమైన ట్వీట్ చేశారు. రిక్షా తొక్కుతూ కుటుంబాన్ని పోషిస్తో్న్న వ్యక్తి కుమారుడు ఇంజినీరింగ్ పూర్తి చేశాడు. కాన్వొకేషన్‌కు తల్లిదండ్రులను తీసుకెళ్లిన ఆ యువకుడు.. కార్యక్రమం పూర్తైన తరవాత అమ్మనాన్నలను రిక్షాపై ఎక్కించుకుని అతడే తొక్కుకుంటూ ఇంటికి తీసుకెళ్లాడు. ఈ ఫొటోను సెహ్వాగ్ ట్వీట్ చేశారు.

‘బ్యూటిఫుల్.. ఇతను ఇంజినీరింగ్ గ్రాడ్యుయేట్ హిజాముద్దీన్ ఖాన్. ఇతని తండ్రి రిక్షా తొక్కుతారు. కాన్వొకేషన్ పూర్తయిన తరవాత తల్లిదండ్రులను రిక్షాపై ఎక్కించుకుని ఇంటికి తీసుకెళ్లాడు’ అంటూ సెహ్వాగ్ ట్వీట్‌లో పేర్కొన్నారు. వందనం చేసే ఎమోజీని కూడా జత చేశారు. వాస్తవానికి హిజాముద్దీన్‌ది బంగ్లాదేశ్. ఢాకా యూనివర్సిటీలో అతను ఇంజినీరింగ్ పూర్తి చేశాడు. కాన్వొకేషన్‌లో పట్టా అందుకోవడానికి తల్లిదండ్రులను తీసుకెళ్లాడు. తిరిగి ఇంటికి వచ్చేటప్పుడు తన హ్యాట్‌ను అమ్మకు పెట్టాడు. కన్వొకేషన్ షూట్‌ను తండ్రికి తొడిగాడు. రిక్షాపై ఎక్కించుకుని ఇంటికి తీసుకెళ్లాడు.

‘అమ్మ నా జీవితానికి కిరీటం. అందుకే కాన్వొకేషన్ హ్యాట్ అమ్మకు పెట్టాను. అబ్బా(నాన్న) కుటుంబాన్ని కాపడటానికి తన చెమటను దారబోశారు. అందుకే ఆ చెమటెక్కిన శరీరానికి షూట్ తొడిగాను. నా మిగిలిన జీవితంలో వారి బరువు బాధ్యతలు మోస్తాను’ అని కాన్వొకేషన్ అనంతరం హిజాముద్దీన్ చెప్పడం విశేషం. ప్రస్తుతం వీరి ఫొటో సోషల్ మీడియాలో వైరల్‌గా మారింది. హిజాముద్దీన్‌ను చూసి అంతా కొడుకంటే ఇలా ఉండాలి అని అందరూ ప్రశంసిస్తున్నారు. ఇంత మంచి ఫొటోను, కొడుకుని భారతీయులకు చూపించినందుకు సెహ్వాగ్‌నూ కొనియాడుతున్నారు.

Beautiful-
This is an engineering graduate , Hisamuddin Khan who's father is a rickshaw puller. Back from convocation he drives his parents home