మళ్లీ నెంబర్ వన్ స్థానాన్ని అందుకున్న విరాటుడు..

Posted: 06/13/2017 09:40 PM IST

టీమిండియా కెప్టెన్ విరాట్ కోహ్లీ మరోమారు తన సత్తా చాటాడు. తన దూకుడు స్వభావాన్ని అటలో కూడా కనబర్చి.. చెలరేగిపోతున్న విరాటుడు ఐసీసీ ర్యాంకింగ్స్‌లో మరోమారు తనకు కొంతకాలం దూరమైన ర్యాంకు తిరిగి అదిమిపట్టుకున్నాడు. ప్రస్తుతం జ‌రుగుతున్న ఐసీసీ ఛాంపియ‌న్స్ ట్రోఫీలో రెండో మ్యాచులో మిన‌హా కోహ్లీ మిగ‌తా రెండు మ్యాచుల్లో కోహ్లీ రాణించడంతో అతని ర్యాంకు కూడా మెరుగుపడింది. దీంతో వ‌న్డే బ్యాట్స్‌మెన్ ర్యాంకింగ్స్‌లో త‌న ర్యాంకును మెరుగు ప‌రుచుకుని మ‌రోసారి అగ్రస్థానానికి ఎగ‌బాకాడు.

తాజాగా అంతర్జాతీయ క్రికెట్ కౌన్సిల్ విడుదల చేసిన వన్డే ( 50 ఓవర్ల పరిమితి మ్యాచ్)లలో కోహ్లీ మళ్లీ నెంబర్ వన్ స్థానానికి ఎగబాకాడు. ఛాంపియ‌న్స్ ట్రోఫీకి ముందు కోహ్లీ మూడో స్థానంలో ఉన్నాడు. ప్రస్తుతం ర్యాకింగ్స్ లో సౌతాఫ్రికా బ్యాట్స్‌మ‌న్ ఏబీ డీ విల్లియ‌ర్స్‌, ఆస్ట్రేలియా బ్యాట్స్‌మెన్ డేవిడ్ వార్నర్‌ల‌ను వెన‌క్కునెట్టేశాడు. ప్రస్తుతం కోహ్లీ వ‌న్డే ర్యాంకింగ్స్‌లో 861 పాయింట్లతో అగ్రస్థానంలో ఉండ‌గా, డేవిడ్ వార్నర్. కోహ్లీ కంటే ఒకే ఒక్క పాయింట్ వెన‌క‌బ‌డి 861 పాయింట్ల‌తో రెండో స్థానంలో ఉన్నాడు.

ఇక  ఏబీ డీ విల్లియ‌ర్స్ 847 పాయింట్ల‌తో మూడో స్థానంలో ఉన్నాడు. ఆ త‌రువాతి స్థానాల్లో వ‌రుస‌గా జో రూట్‌, కానె విలియ‌మ్సన్ ఉన్నారు.  కాగా టీమిండియాకు చెందిన ఓపెనర్ శిఖర్ ధావన్ కూడా ఈ రాక్సింగ్స్ లో పదో స్థానాన్ని అక్రమించుకున్నాడు. ఇదిలావుండగా, రోహిత్ శర్మ 13వ స్థానంలో, మాజీ టీమిండియా కెప్టెన్ ఎంఎస్ ధోని 14వ స్థానంలో కొనసాగుతున్నారు. ఇక బౌలింగ్ విభాగంలో అస్ట్రేలియాకు చెందిన హాజిల్ వుడ్ నెంబర్ వన్ స్తానంలో కొనసాగుతుండగా, టీమిండియాకు చెందిన ఏ బౌలర్ కు టాప్ టెన్ లో ప్రాతినిథ్యం లభించలేదు. కాగా అల్ రౌండర్ జాబితాలో మాత్రం రవీంద్ర జెడేజా 8వ స్థానంలో కొనసాగుతున్నాడు.