ఇషాంత్ శర్మ కొంప ముంచాడు

Posted: 10/20/2013 02:13 PM IST

మొదటి వన్డేలో ఘోర పరాజయం.... రెండో వన్డేలో రికార్డు విజయం.... మూడో వన్డేలో చేతిలో ఉన్న మ్యాచ్ ని చేజార్చుకోవడం...ఇది భారత జట్టు పరిస్థితి . ఏడు వన్డేలో సిరీస్ లో భాగంగా నిన్న రాత్రి మొహాలీలో జరిగిన మూడో వన్డేలో ఆస్ట్రేలియా అనూహ్య విజయం సాధించింది. ఉత్కంఠబరితంగా సాగిన ఈ పోరులో 48 ఓవర్లలో మ్యాచ్ స్వరూపమే మారిపోయింది. ఆ ఓవర్ వేసిన ఇషాంత్ శర్మ 30 పరుగులు ఇవ్వడంతో మ్యాచ్ స్వరూపమే మారిపోయింది. ఆస్ట్రేలియా విజయానికి చివరి 3 ఓవర్లలో 44 పరుగులు కావాలి... చేతిలో నాలుగు వికెట్లు మాత్రమే ఉన్నాయి. వోజెస్ మినహా ప్రధాన బ్యాట్స్‌మెన్ అంతా పెవిలియన్‌లో ఉన్నారు. ఈ దశలో భారత్ విజయం లాంఛనం. కానీ అనిశ్చితికి మారుపేరైన క్రికెట్ లో ఫలితాన్ని మార్చడానికి ఒక్క ఓవర్ చాలు.మొహాలీ వన్డేలోనూ ఇదే జరిగింది.

ఇషాంత్ శర్మ చెత్త బంతులతో ఒకే ఓవర్లో 30 పరుగులు సమర్పించడంతో... గెలవాల్సిన మ్యాచ్‌లో భారత్ ఓడిపోయింది. బాద్యతాయుతంగా కెప్టెన్స్ ఇన్నింగ్ ఆడి ధోని చేసిన సెంచరీకి ఫలితం దక్కకుండా పోయింది. మొదట బ్యాటింగ్ చేసిన ఇండియా నిర్ణీత ఓవర్లలో తొమ్మిది వికెట్లు కోల్పోయి 304 పరుగులు చేసింది. కెప్టెన్ ధోని (121 బంతుల్లో 139 నాటౌట్; 12 ఫోర్లు, 5 సిక్స్‌లు) అద్భుత సెంచరీ సాధించగా... కోహ్లి (73 బంతుల్లో 68; 9 ఫోర్లు) రాణించాడు. అనంతరం ఆస్ట్రేలియా 49.3 ఓవర్లలో 6 వికెట్లకు 304 పరుగులు చేసింది. ఫాల్క్‌నర్ (29 బంతుల్లో 64 నాటౌట్; 2 ఫోర్లు, 6 సిక్స్‌లు) సూపర్ ఇన్నింగ్స్‌తో పాటు వోజెస్ (88 బంతుల్లో 76 నాటౌట్; 7 ఫోర్లు) రాణించడంతో మరో 3 బంతులు మిగిలి ఉండగానే విజయం ఆసీస్ సొంతమైంది. ఏడు వన్డేల సిరీస్‌లో ఆస్ట్రేలియా ప్రస్తుతం 2-1 ఆధిక్యంలో ఉంది. ఇరు జట్ల మధ్య నాలుగో వన్డే బుధవారం రాంచీలో జరుగుతుంది.