రాయల్స్ రాజసమైన విజయం

Posted: 04/18/2013 11:37 AM IST

కలిసి కట్టుగా సమిష్టి ప్రదర్శన చేస్తే ఎంతటి వారినైనా, ఎంతటి జట్టునైనా ఓడించవచ్చునని రాజస్థాన్ రాయల్స్ ఆటగాళ్ళు నిరూపించారు. ఉన్నతమైన ఆటగాళ్ళు ఉన్న ముంబయి జట్టును రాజస్థాన్ రాజల్స్ జట్టు చిత్తు చేసింది. జైపూర్ లోని సవాయ్ స్టేడియంలో జరిగిన ముంబయితో జరిగిన మ్యాచ్ ఏకపక్షంగా సాగింది. రాజస్థాన్ రాయల్స్ బౌలర్ల ధాటికి ముంబయి జట్టు 92 పరుగులకే కుప్పకూలి భారీ ఓటమిని మూటగట్టుకుంది. ముందుగా బ్యాటింగ్ చేసిన రాజస్థాన్ జట్టు ముంబయి బౌలర్లను ఓ ఆట ఆడుకున్నారు. రాజస్థాన్ 20 ఓవర్లలో కేవలం మూడు వికెట్లు మాత్రమే కోల్పోయి 179 పరుగుల భారీ స్కోరు చేసింది. ఓపెనర్ అజింక్య రహానే (54 బంతుల్లో 68 నాటౌట్; 8 ఫోర్లు, 1 సిక్స్) మరో చక్కటి ఇన్నింగ్స్ ఆడాడు. యాజ్ఞిక్ (24 బంతుల్లో 34; 4 ఫోర్లు, 1 సిక్స్), వాట్సన్ (25 బంతుల్లో 31; 5 ఫోర్లు, 1 సిక్స్), హాడ్జ్ (15 బంతుల్లో 27 నాటౌట్; 2 సిక్స్‌లు) రాణించడంతో ఆ జట్టు భారీ స్కోరు నమోదు చేసింది. భారీ లక్ష్యాన్ని ఛేధించడానికి బరిలోకి దిగిన ముంబై ఇండియన్స్ కనీస ప్రతిఘటన కూడా ఇవ్వలేకపోయింది. దినేశ్ కార్తీక్ (32 బంతుల్లో 30; 3 ఫోర్లు), రాయుడు (29 బంతుల్లో 27; 2 ఫోర్లు) మినహా అందరూ విఫలం కావడంతో జట్టు బ్యాటింగ్ కుప్పకూలింది. 18.2 ఓవర్లలో ముంబై 92 పరుగులకే ఆలౌటైంది. రహానేకు మ్యాన్ ఆఫ్ ది మ్యాచ్ అవార్డు దక్కింది.