Posted: 09/26/2012 07:14 PM IST

ప్రపంచ విధ్వంసక బ్యాట్ వీరుల మెరుపులు.. స్టార్ బౌలర్ల మాయాజాలం.. ఆల్‌రౌండర్ల నైపుణ్యం.. అబ్బుర పరిచే ఫీల్డింగ్ విన్యాసాలు.. సంచలనాలు.. ఇలా 20 రోజుల పాటు అభిమానులను కనువిందు చేస్తూ, పరుగుల తుపానులో హోరెత్తించడానికి పొట్టి క్రికెట్ పండుగ వచ్చేసింది. ఎప్పుడెప్పుడాని ఎదురుచూస్తున్న టి-20 ప్రపంచ కప్ సమరం నేటినుంచే. ....గతేడాది భారత్ వేదికగా వన్డే ప్రపంచ కప్ సమరం మిగిల్చిన మధుర స్మృతులు మదిలో ఇంకా కదలాడుతుండగానే.. ఉపఖండంలో మరోసారి విశ్వ క్రికెట్ సంబరం వచ్చేసింది.

నాలుగో టి-20 ప్రపంచ కప్ పోరుకు సర్వం సిద్ధం. ఈ మెగా ఈవెంట్ మంగళవారం శ్రీలంకలో ప్రారంభమవుతోంది. ఆతిథ్య జట్టు లంక, డిఫెండింగ్ చాంప్ ఇంగ్లండ్, మాజీ చాంపియన్లు భారత్, పాకిస్థాన్‌తో పాటు దక్షిణాఫ్రికా, ఆస్ట్రేలియా, వెస్టిండీస్, న్యూజిలాండ్ అగ్రశ్రేణి జట్లుగా బరిలోకి దిగుతున్నాయి. ఇక బంగ్లాదేశ్, జింబాబ్వే, ఐర్లాండ్, ఆఫ్ఘనిస్థాన్ సంచనాలు సృష్టించేందుకు రెడీ అయ్యాయి. ఈ ఈవెంట్‌లో భారత్.. ఇంగ్లండ్, క్వాలిఫయర్ ఆఫ్ఘనిస్థాన్‌తో కలసి గ్రూప్-ఎలో రెండో సీడ్‌గా బరిలోకి దిగుతోంది. కాగా అనూహ్య ఫలితాలకు, సంచలనాలకు మారుపేరైన పొట్టి క్రికెట్లో ఏయే జట్లు ఫేవరెట్లన్నది ఊహించడం కష్టం.