Posted: 03/14/2012 11:00 AM IST

ఊపిరితిత్తుల క్యాన్సర్ వ్యాధితో బాధపడుతున్న టీమిండియా ఆల్‌రౌండర్ యువరాజ్ సింగ్‌కు చికిత్స చివరి దశకు చేరుకుంది. అరుదైన జెర్మ్ సెల్ క్యాన్సర్ వ్యాధితో బాధపడుతున్న యువరాజ్ సింగ్ ప్రస్తుతం అమెరికాలోని బోస్టన్‌లో కీమోథెరపీ చేయించుకుంటున్న విషయం విదితమే. మరో నాలుగు రోజుల్లో తనకు కీమోథెరపీ పూర్తవుతుందని యువరాజ్ సింగ్ ‘ట్విట్టర్’ ద్వారా అభిమానులకు శుభవార్త పంపాడు. ‘మరో నాలుగు రోజుల్లో నాకు కీమోథెరపీ పూర్తవుతుంది. ఇంత త్వరగా స్వస్థత చేకూర్చిన భగవంతుడికి, నా ఆరోగ్యాన్ని కాంక్షిస్తూ ప్రార్ధనలు చేసిన అభిమానులకు కృతజ్ఞతలు తెలియజేసుకుంటున్నా’ అని యువీ ఆ సందేశంలో పేర్కొన్నాడు. ఊపిరితిత్తుల మధ్య ఏర్పడిన కణితి దాదాపు పూర్తిగా నయమైపోయిందని యువరాజ్ సింగ్ గత నెలలోనే అభిమానులకు తెలియజేశాడు. క్యాన్సర్ వ్యాధి నుంచి వేగంగా కోలుకుంటున్న యువరాజ్ సింగ్ మే నెల మొదటి వారానికల్లా మళ్లీ బ్యాట్ చేతబట్టుకుని మైదానంలోకి దిగుతాడని భావిస్తున్నట్టు అతని వైద్యుడు తెలిపాడు. మరో నాలుగైదు రోజుల్లో కీమోథెరపీ పూర్తయినప్పటికీ ఈ నెల చివరి వారం వరకు యువరాజ్‌కు చికిత్స కొనసాగుతుందని, ఏప్రిల్‌లో అతనికి రిహాబిలిటేషన్ ప్రక్రియ ప్రారంభమవుతుందని వైద్యులు తెలిపారు. గత ఏడాది నవంబర్‌లో స్వదేశంలో వెస్టిండీస్‌తో రెండు టెస్టులు ఆడిన తర్వాత యువరాజ్‌కు క్యాన్సర్ వ్యాధి సోకినట్టు వైద్యులు తేల్చారు. దీంతో అప్పటి నుంచి క్రికెట్‌కు దూరంగా ఉన్న యువీ గత నెల నుంచి బోస్టన్‌లో చికిత్స చేయించుకుంటున్న విషయం తెలిసిందే.