Posted: 12/09/2011 05:30 PM IST

గత మూడు వన్డేల్లో విఫలమైన ఈ డాషింగ్ బ్యాట్స్‌మన్ ఇండోర్ వన్డేలో జూలు విదిల్చాడు. వీరబాదుడుకి కేరాఫ్ అడ్రస్‌గా తనను ఎందుకు పిలుస్తారో మరోసారి అందరికీ చాటిచెప్పాడు. తద్వారా వన్డేల్లో డబుల్ సెంచరీతో సరికొత్త రికార్డులను నెలకొల్పాడు. ఫామ్‌లో లేక విమర్శలు ఎదుర్కొంటున్న డాషింగ్ బ్యాట్స్‌మన్ వీరేంద్ర సెహ్వాగ్ నాలుగో వన్డేలో తన విశ్వరూపం చూపించాడు. తద్వారా 2010లో సచిన్ నెలకొల్పిన రికార్డును బ్రేక్ చేశాడు. 140 బంతుల్లో డబుల్ సెంచరీ పూర్తి చేసిన సెహ్వాగ్ 219 పరుగులకు ఔటయ్యాడు. వన్డేల్లో ఇదే అత్యధిక వ్యక్తిగత స్కోర్‌. ప్రపంచ వన్డే క్రికెట్‌లో నమోదైన రెండు డబుల్ సెంచరీలు భారత క్రికెటర్లు చేసినవే. మొత్తం మీద వీరేంద్రుని విశ్వరూపాన్ని ప్రత్యక్షంగా తిలకించిన ఇండోర్ ఫ్యాన్స్ ఆనందానికి హద్దే లేకుండా పోయింది.