స్టెప్పులకు స్టేజ్ అదిరిపోతోంది...!

Posted: 06/09/2016 12:36 PM IST

తెలుగు ఫిలిం ఇండస్ట్రీలో జూనియర్ ఎన్టీఆర్‌ డ్యాన్సుల గురించి ప్రత్యేకంగా చెప్పక్కర్లేదు. క్లాసికల్‌ డ్యాన్స్‌ నేర్చుకొని మరీ బరిలో దిగాడేమో, ఎలాంటి స్టెప్పులైనా చిటికెలో చేసేస్తాడు యంగ్ టైగర్. మెరుపు కంటే వేగంగా కాలు, స్ప్రింగ్ లా శరీరాన్ని వంచగలిగిన సత్తా ఉన్న నటుడు. ఇప్పుడు ప్రస్తుతం ‘జనతా గ్యారేజ్‌’ సినిమాలోనూ అలాంటి స్టెప్పులతోనే అదరగొట్టబోతున్నాడట.

 కొరటాల శివ దర్శకత్వంలో వస్తున్న ఈ సినిమా ఇటీవలే చెన్నైలో షూటింగ్ ని ముగించుకుని హైదరాబాద్ కి వచ్చింది. ఈ సందర్భంగా ఎన్టీఆర్ , సమంతలపై ఓగీతాన్ని తెరకెక్కిస్తున్నాడు డ్యాన్స్ మాస్టర్ శేఖర్.  ఈ పాట కోసం కళా దర్శకుడు ప్రకాష్‌ ఆధ్వర్యంలో నాలుగు సెట్లు వేశారు. ‘‘డ్యాన్సుల విషయంలో ఎన్టీఆర్‌ ఎప్పుడూ ప్రత్యేక శ్రద్ధ తీసుకొంటాడు. అందుకే సెట్ లో ఒకరోజు ముందుగానే డ్యాన్స్ ప్రాక్టీస్ మొదలెట్టాడట. ఈ ప్రాక్టీస్ స్టెప్పులు చూసిన ఈ పాట గేయ రచయిత రామజోగయ్యశాస్త్రి ఎన్టీఆర్ ఎనర్జీని చూసి షాకయ్యాడట.

ప్రాక్టీస్ లోనే ఈరకంగా స్టెప్పులు వేస్తే కెమెరా ముందు యాక్షన్ అంటే స్టేజ్ అదిరిపోతుందేమో అంటూ తారక్ ని తెగ పొగిడేశాడు. ఇక తారక్ సరసన స్టెప్పులు వేయాలంటే సమంత , నిత్యామీనన్ లు ఎంత కష్టపడాలో అప్పుడు అర్ధమైంది శాస్త్రిగారికి. దీనికి తోడు సమంత ట్విట్టర్ లో సైతం తారక్ తో డ్యాన్స్ అంటే మాటలు కాదని, చాలా ప్రాక్టీస్ అవసరమని ట్వీట్ చేసింది. దీంతో ఒక్కసారిగా ఇప్పుడు అందరి దృష్టి జనతాగ్యారేజ్ పై పడింది. సినిమాలో సాంగ్ ఎలా ఉంటుందో, దానికి తారక్ ఎలాంటి స్టెప్పులు వేసాడో అంటూ అభిమానులు ఆసక్తిగా ఎదురుచూస్తున్నారు.  

- మూర్తి