మహేష్ బాబుపై వస్తున్న పైసల పుకార్లు

Posted: 04/29/2015 10:14 AM IST

టాలీవుడ్ హీరో ప్రిన్స్ మహేష్ బాబుకు దేశవ్యాప్తంగా భారీ క్రేజ్ వున్న విషయం అందరికి తెలిసిందే. ఇప్పటికే పలు వాణిజ్య వస్తువులకు బ్రాండ్ అంబాసిడర్ గా కూడా మహేష్ వ్యవహరిస్తున్నారు. తన సినిమాలతోనే కాకుండా పలు షాప్ ఓపెనింగ్స్, వాణిజ్య సంస్థలతో పనిచేస్తూ భారీగా సంపాదించేస్తున్నాడు.

అయితే భారీగా రెమ్యునరేషన్ తీసుకుంటున్న మహేష్ పై ఈ మధ్య రెమ్యునరేషన్ పుకార్లు బాగా ఎక్కువయ్యాయి. తాజాగా తానా సభలో పాల్గోనాలని మహేష్ కు ఆహ్వానం అందిందట. అయితే ఇందుకోసం మహేష్ కోటిన్నర రూపాయల రెమ్యునరేషన్ అడిగినట్లుగా గతకొద్ది రోజులుగా వార్తలొస్తున్నాయి.

కానీ ఈ వార్తలను మహేష్ అభిమానులు ఖండిస్తున్నారు. ఈ విషయంపై రకరకాల వార్తలు వినిపిస్తున్నాయి. మహేష్ తనకున్న క్రేజ్ ను బట్టే ఇలా భారీగా రెమ్యునరేషన్ తీసుకుంటున్నాడని ఒకవైపు వాదన, కాదు.. ‘హీల్ ఎ చైల్డ్’ అనే సంస్థకు ఆ డబ్బును సహాయం చేయడానికే తీసుకుంటున్నాడని మరో వాదన, అలా కాకుండా తానాకు పోటీగా పలు సంస్థలే ఇలా తప్పుడు ప్రచారం చేస్తున్నాయని వాదనలు వినిపిస్తున్నాయి.

ఈ వార్తలు విని విసిగిపోయిన మహేష్... చివరకు తాను ఈ ‘తానా’ సభలకు రావడం లేదని చెప్పినట్లుగా సమాచారం. మరి ఈ సభలకు మహేష్ వెళుతాడో లేదో త్వరలోనే తెలియనున్నాయి. మహేష్ ప్రస్తుతం నటిస్తున్న ‘శ్రీమంతుడు’ (వర్కింగ్ టైటిల్) చిత్ర షూటింగ్ శరవేగంగా జరుగుతోంది. త్వరలోనే ప్రేక్షకుల ముందుకు రానుంది.