మాస్, విక్టరీ కాంబినేషన్లో జిల్లా

Posted: 03/07/2015 10:45 AM IST

టాలీవుడ్ అగ్ర స్టార్ హీరో విక్టరీ వెంకటేష్ గతకొద్ది కాలంగా వరుస మల్టీస్టారర్ చిత్రాలతో బిజీగా వున్నారు. అయితే తాజాగా మరో మల్టీస్టారర్ చిత్రానికి గ్రీన్ సిగ్నల్ ఇచ్చినట్లుగా తెలిసింది. ‘సీతమ్మ వాకిట్లో సిరిమల్లె చెట్టు’ చిత్రం తర్వాత రామ్ తో కలిసి ‘మసాలా’, ఆ తర్వాత ఇటీవలే పవన్ కళ్యాణ్ తో కలిసి ‘గోపాల గోపాల’ వంటి బ్లాక్ బస్టర్ హిట్ చిత్రంలో నటించాడు.

‘గోపాల గోపాల’ సినిమా భారీ హిట్టవ్వడంతో వెంకీకి భారీ మల్టీస్టారర్ అవకాశాలు వస్తున్నాయి. తాజాగా వెంకీ మరో మల్టీస్టారర్ చిత్రానికి గ్రీన్ సిగ్నల్ ఇచ్చినట్లుగా తెలిసింది. తమిళంలో మోహన్ లాల్, విజయ్ ప్రధాన పాత్రలలో నటించిన ‘జిల్లా’ సినిమా అక్కడ భారీ ఘనవిజయం సాధించింది.

ఆ చిత్రాన్ని తెలుగులో రీమేక్ చేయాలని పలు దర్శకనిర్మాతలు ప్రయత్నాలు చేస్తున్నారు. అయితే ఈ చిత్ర తెలుగు రీమేక్ లో వెంకటేష్, రవితేజలు కలిసి నటించనున్నారని వార్తలొస్తున్నాయి. మోహన్ లాల్ పాత్రలో వెంకటేష్, విజయ్ పాత్రలో రవితేజ నటించనున్నారని సమాచారం.

ఈ ప్రాజెక్టుకు దర్శకుడు వీరుపోట్ల దర్శకత్వం వహించనున్నాడని సమాచారం. కథలో కొన్ని చిన్న చిన్న మార్పులు జరిపి, తెలుగు నేటివిటికి తగ్గట్లుగా తెరకెక్కించనున్నారని తెలిసింది. ప్రస్తుతం రవితేజ ‘కిక్2’, ‘బెంగాల్ టైగర్’ చిత్ర షూటింగ్ లో బిజీగా వున్నాడు. ఈ సినిమాల తర్వాత ‘జిల్లా’ రీమేక్ సెట్స్ పైకి వెళ్లే అవకాశాలున్నట్లుగా తెలుస్తోంది.