పదవీ పాయె.. పరువు పోయె.. ఇంకెందుకు ?

Posted: 12/08/2014 06:52 PM IST

బీసీసీఐ మాజి చైర్మన్ ఎన్. శ్రీనివాసన్ పై సుప్రీం కోర్టు తీవ్రంగా స్పందించింది. ఆయన్ను ఎలా నమ్మాలి? అని ప్రశ్నించింది. ఫిక్సింగ్ కేసు నివేదికపై సోమవారం విచారణ జరిపిన సుప్రీం.., బీసీసీఐ చైర్మన్ గా ఉన్న వ్యక్తి ఓ జట్టుకు యజమానిగా కూడా వ్యవహరించారని గుర్తించింది. ఇలా ద్వంద బాద్యతలు నిర్వర్తించిన వ్యక్తికి ద్వంద ప్రయోజనాలు లేవంటే ఎలా నమ్మాలి? అని ప్రశ్నించింది. బాధ్యతాయుతమైన పదవుల్లో కొనసాగే వ్యక్తులు వివాదాలకు దూరంగా ఉండాలని సూచించింది.

ఇదే సమయంలో శ్రీనివాసన్ తరపున వాదనలు విన్పించిన సిబల్, తన క్లైంటుకు ఫిక్సింగ్ తో సంబంధం లేదన్నారు. ఈ ఆరోపణలు శ్రీనివాసన్ ను బీసీసీఐకి దూరం చేసేందుకు ప్రత్యర్థుల కుట్రలుగా ఆరోపించారు. గతంలో కూడా ఇలాంటి ఆరోపణలు చేశారని ఉదహరించారు. ఇవన్నీ పక్కనబెడితే గతంలో స్పాట్ ఫిక్సింగ్ విషయంలోనే శ్రీనివాసన్ పై సీరియస్ అయిన సుప్రీం కోర్టు, ఆయన్ను తప్పించింది. ఆ తర్వాత వరుసగా విమర్శలు చేస్తూ పరువు తీస్తోంది. ఈ నేపథ్యంలోనే ఐసీసీకి చీఫ్ గా ఉన్న వాసన్ కోర్టు విమర్శలపై ఎలా సమాధానం చెప్తారో చూడాలి.

కార్తిక్