ఆమెపైనే కోమటిరెడ్డి అలక

Posted: 11/28/2014 08:31 AM IST

అప్పడప్పుడూ రాజకీయ నేతలు కూడ చిన్న పిల్లల్లా ప్రవర్తిస్తారు. తమకు అవకాశం దక్కలేదనీ.., ఫ్లెక్సీలో ఫోటో వేయలేదని, పేపర్లో పేరు రాలేదని ఇలా చిన్న చిన్న విషయాలకు కూడా అలకబూనుతారు. ఇక వీరిని బుజ్జగించేందుకు ఎంతో కష్టపడాల్సి ఉంటుంది. తాజాగా తెలంగాణ ముఖ్యమంత్రి కూడా అలకబూనిన కాంగ్రెస్ నేతను బుజ్జగించారు. తెలంగాణ కాంగ్రెస్ పార్టీ సీనియర్ నేత, ఎమ్మెల్యే కోమటిరెడ్డి వెంకట్ రెడ్డి గురువారం రోజు అలకబూనారు. ఓ విషయంపై సభలో మాట్లాడేందుకు కోమటిరెడ్డి రెడి అయి లేవగా.. సభాద్యక్ష స్థానంలోని డిప్యూటి స్పీకర్ పద్మా దేవేందర్ రెడ్డి అనుమతి ఇవ్వలేదు. అప్పటికే కాంగ్రెస్ నుంచి ముగ్గురు మాట్లాడినందున అవకాశం ఇవ్వలేనని స్పష్టం చేశారు.

తనను మాట్లానివ్వకపోవటంపై ఎమ్మెల్యేసార్ మనస్తాపం చెందారు. సీనియర్ కే చాన్స్ ఇవ్వరా అంటూ సభలో నుంచి చెప్పా పెట్టకుండా బయటకు వెళ్లిపోయారు. విషయం తెలుసుకున్న కేసీఆర్, టీఆర్ఎస్ కు చెందిన ఇద్దరు ఎమ్మెల్యేలను పంపి మరీ వెంకట్ రెడ్డిని సభలోకి తీసుకొచ్చారు. అందరి ముందూ., వెంకటరెడ్డి సాబ్ ఇట్ల అయితే ఎట్లా.. చిన్న ముచ్చటకే అసెంబ్లీపై అలుగుతవా అని ప్రశ్నించారు. స్పందించిన కోమటిరెడ్డి.., ‘నా అలక సభపై కాదు, డిప్యూటీ స్పీకర్ పై’ అన్నారు. దీంతో అంతా ఆశ్చర్యపోయారు. చివరకు సీఎం సార్ బుజ్జగించటంతో.., ఎమ్మెల్యేగారు మెత్తబడ్డారు.

 

కార్తిక్